Solong liderato inupuan ng Fighting Maroons

MANILA, Philippines — Humugot ng lakas ang Univeristy of the Philippines sa second half upang kalusin ang University of the East, 91-81 kagabi sa UAAP Season 89 collegiate men’s basketball tournament na nilaro sa UST Quadricentennial sa España, Manila.

Nakaligtas sa muntikang pagkatalo ang Figh­ting Maroons dahil sa mainit na laro ng Red Warriors sa first half kung saan ay naghabol sila ng tatlong puntos, 45-48 sa halftime.

Dahil sa panalo ng Fighting Maroons nasolo nila ang top spot ng team standings tangan ang 5-2 record, habang magkasalo sa No. 2 ang Far Eastern University Tamaraws at National University Bulldogs na may tig-4-2 baraha.

“Actually naunahan ka­mi ng UE in a way. That’s one test for the team, coming from behind, pla­ying tough defense para makabalik sa game. Along the way siyempre kaila­ngan namin matuto to start strong. I guess as we go along sa season, we’ll learn to do those,” sabi ni UP head coach Goldwin Monteverde.

Bumira si James Pa­yosing ng impresibong double-double na 16 points at 12 rebounds para sa UP na na tinarak ang three-game winning streak.

Nanatiling nasa ilalim ang Red Warriors na wala pang panalo sa pitong laro.

Bumakas naman si Chicco Briones ng 13 points mula sa perfect 3-of-3 sa shooting para sa UP habang tig-12 at 11 ang binakas nina Gani Stevens at Veejay Pre, ayon sa pag­kakasunod.

Pinamunuan naman ni Toper Lagat ang opensa para sa Red Warriors sa tinikadang  26 markers.

Samantala, hinablot ng Univeristy of Sto. Tomas  ang No. 4 spot sa team standings matapos nilang lapain ang Ateneo de Manila University, 80-68.

Nirehistro ng Growling Tigers ang 4-3 karta matapos ang mabangis na laro nila sa third canto.

Naging mahigpittan ang laban sa unang dalawang period kung saan ay dalawang puntos lang ang lamang ng Growling Tigers, 34-32 sa halftime.

Nalasap ng Blue Eagls ang pang-apat na talo sa pitong salang.