Hearsay

Gipresentar sa prosecution ang ilang unang testigo nga mopabarog sa pasangil nga pagpanghulga ni Bise Presidente Sara Duterte sa kinabuhi ni Presidente Bongbong Marcos Jr., Liza Araneta Marcos ug Martin Romualdez.

Ang gipresentar mao si John Carlo Calilung, senior agent sa National Bureau of Investigation. Si Calilung gipresentar dili isip usa ka expert witness kun dili lamang ka competent witness. Wala gipresentar si Calilung isip usa ka expert witness tungod kay dili siya kuwalipikado kay duha ra ka semana ang training niya.

Wala pod si Calilung ipresentar nga ordinary witness tungod kay matawag nga hearsay ang iyang testimonya. Gani mao kini ang gitirada ni Atty. Carlo Narvasa sa depensa sa iyang cross examination questions diin iyang gipangutana si Calilung kun aduna bay mga sakop sa media nga nakatambong sa press conference ni Bise Presidente Sara Duterte diin iyang nalitok ang kontrobersiyal nga pagpanghulga.

Tungod kay wala didto sa press conference si Calilung. Wala siyay personal knowledge. Ang gipunto sa depensa sa iyang cross examination mao nga hearsay ang testimoniya ug wala kini makaprobar nga nagkontrata na gayod og tawong mopatay nila ni PBBM, Liza Araneta Marcos ug Martin Romualdez si Bise Presidente Sara Duterte.

Ubos sa hearsay rule on evidence, ang ipresentar nga testigo mao kadtong anaa gayod personal knowledge sa iyang itestigo. Sama pananglit kun siya nakakita sa krimin unya aduna siyay gisultian sa krimin nga iyang nakitan, ang ipresentar nga testigo kadto gayong nakakita ug dili kadtong iyang gisultihan sa iyang nakita.

Si Calilung sa iyang cross examination miangkon nga walay sakop sa media nga mi-execute og affidavit nga nag asoy sa gisulti ni Bise Presidente Sara Duterte mahitungod sa iyang pagpanghulga. Busa hearsay ang iyang testimonya.