Chua tinalo si Isleta sa PAI National Trials

MANILA, Philippines – Sinapawan ni Southeast Asian Games record-holder Xiandi Chua si SEAG champion Chloe Isleta sa kanilang duwelo sa Individual Medley sa Philippine Aquatics, Inc. (PAI) National Trials 25-meter (short course) sa Teofilo Yldefonso Swimming pool sa Rizal Memorial Sports Complex sa Malate, Manila.

Naglista ang Business Entrepreneur student ng De La Salle University ng bilis na 2:16.22 sa girls’ 200-meter IM para sa gold medal at talunin si Isleta (2:16.35).

“It’s too close, but I’m happy with my swim. It’s still a work in progress, specially in my underwater technique,” sabi ng 23-anyos na si Chua.

Si Chua ay miyembro ng Melbourne Swim Club at naitala ang bagong SEAG record sa 200m backstroke (2:13.20) sa nakaraang SEAG sa Cambodia.

Pumangatlo naman si 2022 World Junior Championships semifinalist Micaela Jasmine Mojdeh (2:23.25).

Nakakuha na ang 18-anyos na Grade 12 student sa Brent International ng Philippine team spot para sa SEA Age Group Championship sa Bangkok, Thailand sa Disyembre 6-10 matapos magtala ng dalawang SEA Age Qualifying Time Standard (QTS) sa 50-meter long course trials.

Nakabawi si Isleta ng Chloe Isleta Aquatics sa pagrereyna sa 100m backstroke sa oras na 1:00.31 kasunod sina Chua ng Top Swim Club (1:01.14) at Tarlac pride Trixie Ortiguerra (1:03.79) sa event na suportado ng Speedo, Pocari Sweat at Philippine Sports Commission (PSC).

Ang National Trials ay batayan ng PAI sa pagpili ng mga miyembro ng Philippine Team na isasabak sa World Aquatics World Series.

Ang World Series ay binubuo ng kompetisyon sa Series 1 sa Oktubre 18-20 sa Shanghai, China; Series 2 sa Oktubre 24-26 sa Incheon, South Korea; at Series 3 sa Oktubre 31 hanggang Nobyembre 2 sa Singapore.

Ang serye ay magtatapos sa Championships sa Disyembre 10-15 sa Budapest, Hungary.

Nanguna si rising star Riannah Coleman sa girls’ 50m backstroke sa oras na 33.75 laban kina Krystal David (34.50) at Jamaica Enriquez (34.92).

Nakapasok din ang Fil-Am sa PH Team patungong Bangkok tilt na may tatlong QTS breaking performance sa long course trials — 50m breaststroke (33.96), 200m breaststroke (2:43.55) at 100m breaststroke (1:14.12).

Ang iba pang nanalo ng gintong medalya ay sina Miguel Barreto sa boys’ 400m freestyle (4:00.87), Jie Angela Mikaela Talosig sa girls’ 400m freestyle (4:32.62); Rian Marco Tirol sa boys’ 50m backstroke (27.69); Jerard Dominic Jacinto sa boys’ 100 backstroke (56.11) at Nathan Farrel Jao sa boys’ 200m IM (2:02.20).