FiberXers muntikan sa Dyip

MANILA, Philippines — Kagaya ng NLEX, muntik ring maagaw ng Terrafirma ang panalo sa Converge.

Ngunit nakalusot ang FiberXers kontra sa Dyip, 105-103, para dumiretso sa ikalawang sunod na panalo sa Group A ng PBA Season 50 Governors’ Cup kahapon sa Smart Araneta Coliseum.

Kumolekta si center Justin Arana ng 31 points, 10 rebounds at 3 assists, habang may 19 markers si Juan Gomez de Liano para sa 2-0 record ng Converge.

“Siguro kapag kalaban kami ng Terrafirma tala­gang ganado po sila talaga,” ani coach Delta Pineda, nakahugot kay balik-import Jalen Hudson ng dalawang puntos. “We had a 16-point lead, pero nahabol pa rin po. Good thing nalampasan namin iyong Terrafirma.”

Nag-ambag si Justine Baltazar ng 16 points, 14 boards at 2 blocks at may 13 at 12 markers sina Archie Concepcion at MJ Garcia, ayon sa pagkakasunod.

Bagsak ang Terrafirma, muntik na ring masilat ang NLEX, 100-101, noong Linggo, sa 1-2 baraha sa kabila ng hinakot na 40 points, 11 rebounds at 5 assists ni import Justin Strings.

Ipinoste ng FiberXers ang isang 16-point lead, 80-64, sa huling 2:52 minuto ng third quarter mula sa lay­up ng 6-foot-6 na si Arana.

Ngunit unti-unti itong naputol ng Dyip sa 84-91 sa likod nina Strings, CJ Catapusan at Juami Tiongson sa 6:44 minuto ng fourth quarter.

Muling nakalayo ang Converge sa 100-89 ga­ling sa three-point shot ni De Liano sa 5:01 minuto ng laro bago makadikit ang Terrafirma sa 103-105 mula sa triple ni Tiongson.

Talbog ang tangkang tres ni Hudson at four-point shot ni Baltazar sa panig ng FiberXers na nagbigay ng posesyon sa Dyip.

Ngunit binutata ni Baltazar ng Converge ang tira ni Terrafirma forward Aljon Mariano sa natitirang 23 segundo.