Laslas sa budget sa Sugbo

Dunay laing higanteng proyekto sa Sugbo nga gisabotahe sa mga kongresista: Ang New Cebu International Container Port Project (NCICP) in Tayud, Consolacion, Cebu, gigahinan ni Presidente Ferdinand Marcos Jr. og ?8.988 bilyones para sa 2027. Pero gilaslasan nila og ?2.98 bilyones (33.2%) ug gibinlan og ?6 bilyones.

Puno kini sa Cebu-Mactan 4th bridge project nga gilaslasan sa House og ?6 bilyones (70%). Nangayo unta si Marcos Jr. og ?8.57 bilyones para sa proyekto sa 2027. Pero gihatagan lang sa mga kongresista og ?2.57 bilyones.

-o0o-

Ang duha ka proyekto sa Sugbo kabahin sa foreign-assisted projects nga giinitan sa mga kongresista. Gigahinan unta ni Marcos Jr. og ?414 bilyones para sa 2027 pero gilaslasan sa House og ?130 bilyones

Gipasimang nilang ?284 bilyones ngadto sa multipurpose buildings (nga walay klaro asa nga mga barangay tukuron) ug farm-to-market roads (nga ang coordinates naa sa kadagatan). Gipaburot sang mga ayuda nga kinahanglang moagi nila; MAIFIP sa Department of Health, AICS sa Department of Social Welfare and Development, ug TUPAD sa Department of Labor and Employment.

-o0o-

Ang NCICP gastohan og ?16.9 bilyones. Inutang ang pundo sa Export-Import Bank of Korea-Economic Development Cooperation Fund. Gipaabot nga mahuman sa 2028 ug kadunggoan na sa mas daghan ug mas dagkong mga barko.

Gikabalak-an ang paglaslas sa budget makapalangay sa pagtukod sa access roads nga mosumpay sa NCICP sa Tayud ngadto Cebu North Coastal Road sa Mandaue City ug sa Liloan, aron mlaktawan ug dili matanggong ang mga kargamento sa huot nga trapiko sa nasudnong highway.

-o0o-

Angayng pangayoan og katin-awan si Kongresista Daphne Lagon sa ikaunom nga distrito (Consolacion ug Cordova) nganong gilaslasan ang budget sa NCICP. Sa samang paagi nga pa-esplikaron silang Kongresista Lolypop Ouano sa Mandaue ug Kongresista Ahong Chan sa Lapu-Lapu nganong gilaslasan ang budget sa 4th bridge.

Angay sang pangutan-on ang ubang mga kongresista sa Sugbo, gawas nilang Cutie del Mar nga nisupak ug Karen Garcia nga ni-abstain, nganong nipabor sa House version sa budget. Gisakripisyo bang 4th bridge ug NCICP kay makalilisang ang multipurpose buildings ug farm-to-market roads nga gisaad nga tukuron sa ilang distrito?

BLURB: “Angayng pangayoan og katin-awan si Kongresista Daphne Lagon sa ikaunom nga distrito nganong gilaslasan ang budget sa NCICP.”