EDITORYAL - Muling pagpapatupad ng No Contact Apprehension Policy
Muling ipinatupad noong Lunes (Oktubre 5) ang No Contact Apprehension Policy (NCAP) sa Maynila, Muntinlupa, Quezon City at San Juan.
Sa ilalim nito, camera ang huhuli sa traffic violation at ipapadala na lamang sa vehicle owner ang notice at multa.
Ang mga lungsod ng Valenzuela at Parañaque naman ay nagpasyang ipagpaliban muna ang implementation ng NCAP.
May magandang dahilan para gamitin ang teknolohiya sa traffic enforcement.
May litrato o video ng violation at nababawasan ang direktang interaction sa enforcer at kasama nito ang pagkakataon para sa makaiwas sa kotong o pakiusap sa kalsada.
Pero kung ibabalik ang NCAP, hindi sapat na mahusay ang camera. Dapat malinaw at patas din ang buong proseso pagkatapos makuhanan ang motorista.
Tiniyak ng MMDA na walang double penalties dahil magkahiwalay ang lokasyon ng LGU at MMDA cameras.
May online protest mechanism din para kuwestiyunin ang citation.
Magandang safeguards iyan, pero dapat madaling gamitin sa aktuwal, hindi lang nakasulat sa guidelines.
Paano kung mali ang plate number? Paano kung hindi ang registered owner ang nagmamaneho?
Paano kung may emergency?
Kailangang mabilis makita ng motorista ang ebidensiya at malinaw kung saan at paano maghahain ng reklamo.
May dagdag pang problema ngayon: ginagamit na rin ng scammers ang NCAP. Nagbabala ang MMDA at PNP laban sa pekeng text tungkol sa traffic violations na may kahina-hinalang links at humihingi ng personal o financial information.
Kaya lalong kailangan ng isang malinaw at madaling makilalang official notification system.
Dapat ding transparent kung saan napupunta ang nakokolektang multa at kung ano ang natatanggap ng private contractors.
May mga usapin na ring binanggit tungkol sa compensation arrangements sa dating NCAP setup.
Disiplina ang layunin dapat ng NCAP, hindi kalituhan, hindi pananakot, at lalong hindi pagkakakitaan ng mga nagpapatupad nito.
Sana sa pagkakataong ito ay maipatupad nang maayos, naaayon at may kabuluhan ang No Contact Apprehension Policy.
- Latest
