Boto o Pabor?

Hindi naman siguro mahirap intindihin kung bakit napapakunot-noo ang mga tao sa pagpapaliban ng halalan sa barangay. Ang tanong ng masa: bakit kailangan pang ipagpaliban?

Ang barangay ang pinakaunang pintuan ng gobyerno. Kapag may problema sa komunidad, barangay ang unang nilalapitan. Kapag kailangan ng dokumento, tulong o aksyon, barangay ang unang hinahanap. Kaya kung ang halalan ay ililipat pa sa 2028, hindi lang simpleng pagbabago ng petsa ang pinag-uusapan. Nadaragdagan din ang panahon ng mga nakaupo para manatili sa puwesto.

At dito pumapasok ang tanong na hindi dapat ikatakot. Sino ang nakikinabang sa dagdag na panahon?

Hindi ibig sabihin na kapag nagtanong ka, kalaban ka na. Hindi rin ibig sabihin na kapag may duda ang tao, may masama nang nangyayari. Ganyan dapat ang demokrasya. may nagtatanong, may nagpapaliwanag, at may mamamayang hindi basta-basta napapaniwala sa “ganyan talaga.”

Mas sensitibo ang usapin dahil papalapit ang 2028. Ang barangay ay hindi lang lugar na may kapitan at mga kagawad. Dito nagsisimula ang maraming ugnayan, suporta at kilos sa komunidad.

Kaya kung ipagpapaliban ang halalan, dapat klaro sa publiko kung bakit. Hindi puwedeng ang sagot ay puro pa­lusot. Hindi puwedeng “hintay na lang.” Dahil ang mandato ng opisyal ay hindi sariling pag-aari. Hiniram lang ‘yan sa taong bumoto.

Kung kailangan talagang ipagpaliban, dapat may malinaw, makatuwiran at pampublikong dahilan. At kung may epekto ito sa susunod na halalan, dapat pag-usapan nang bukas—hindi iyong tahimik lang at bahala na ang mga tao.

Dahil sa huli, simple lang naman ang prinsipyo: Ang boto ng tao, hindi dapat pinapahaba sa papel. Dapat pinapahaba lang kapag muling ibinigay sa balota.

At kung may gustong magtanong kung sino ang pabor sa ganitong setup, simple rin ang sagot. Hindi masama ang magtanong. Mas masama kung bawal nang magtanong.

Disclaimer: Ang artikulong ito ay isang opinyon at komentaryo batay sa impormasyon.  Hindi nito pinatutunayan bilang katotohanan ang anumang alegasyon tungkol sa motibo o pakinabang ng sinumang tao o grupo. Layunin nito ang pampublikong talakayan tungkol sa halalan, mandato at pananagutan sa isang demokratikong lipunan.