EDITORYAL - MRF idlas sa Cebu City

Nagtinguha karon ang Cebu City nga hangyoon ang Dakbayan sa Toledo aron didto nalang niini dad-on ang inadlaw-adlaw nga makolektang basura imbes nga didto sa landfill sa lungsod sa Aloguinsan.

Ang maong landfill sa Toledo City, gawas nga mas duol kun itandi sa Aloguinsan, gikatahong mas lapad kini ug mas maka-accommodate pagdawat sa dinaghang basura gikan sa Cebu City.

Ang Cebu City makakolekta og gibanabanang 700 toneladang basura kada adlaw. Apan nagkaproblema kini karon human nga nasirad-an ang Binaliw Landfill tungod sa trahedya niadtong bulan sa Enero diin 36 ka tawo nga nakalas tungod sa pagdahili sa basura.

Tungod ana, ang Cebu City napugos nga adto nalang maglabay og basura sa Aloguinsan, 60 kilometros gikan sa siyudad. Apan tungod sa gilay-on, nahimong diskusyon sa Cebu City ang gastos sa siyudad para ani.

Ang Cebu City isip labing daku ug labing progresibong siyudad sa isla sa Sugbu, apan way kaugalingong basurahan.

Matud pa nga milyones ka pesos ang gikinahanglang gastuhon sa Cebu City kada adlaw para lang sa paghakot sa basura padung sa Aloguinsan, nga gikabalak-ang mao ra unyay makaut-ot sa panudlanan sa dakbayan.

Apan husto ba kaha ni nga sa Toledo nalang dad-on ang basura? Unsa nalang may ikasulti sa mga taga Toledo bahin ani? Ang environmental impact ana sa ilang siyudad kung pananglitan tag 700 ka toneladang basura na ang dad-on diha sa ilang dapit kada adlaw?

Gawas pa ana, dili man tingali husto nga isipong malungtarun na kini nga solusyon sa problema kay sa kadugayan, moabot gyud sa punto nga mapuno ang maong landfill ug naa nasay laing environmental disaster nga mahitabo.

Ang Cebu City mapasigarbuhon kaayo nga siyudad tungod sa paglambo niini ug sa kadaghan sa mga dagkong negosyo nga anhi nagbase. Gani nabansagan kining Queen City of the South.

Dili ba mas maayong isipon nga ang Cebu City mahimong sumbanan sa tanan pag-abot sa hustong paghipos ug pagdumala sa basura?

Nganong dili man gyud mangusog ug moseryuso ang Cebu City pagtukod og dako, lapad, moderno nga material recovery facility?  Nga puyde gyud mapasigarbo sa siyudad?