Gagmay’ng drainage

Hisgotan nato ang mga dapit dinhi sa Cebu City nga gibahaan kaniadtong Huwebes sa hapon. Diri dapit sa Fuente Osmeña, lawom usab kaayo ang tubig nga milunop sa Osmeña Boulevard.

Nagtuo ko nga ang dapit diha sa eskina Osmeña Boulevard ug Julio Llorente Street ug duol nga mga lugar, maglunop gyud kay gagmay ang mga drainage system ug dili makaato pagpaagas sa tubig kon kusog ang uwan.

Ang Fuente Osmeña duna lay gilay-on nga mga 200 metros paingon sa Guadalupe River. Kon ang maong dapit butangan og dakong drainage system, sigurado ko nga makuli na mahitabo nga maglunop dihang dapita.

Didto sa Labangon ug Tisa, ilabi na sa La Paloma Subdivision, tan-aw nako susama gihapon ang problema nga gagmay ang drainage system nga dili makaato pagpaagas sa tubig.

Dili sab imposible nga ang mga covered drainage system nga anaa daplin sa karsada napuno na sa mga lapok. Kini unta maoy han-okan sa mga drainage project sa kongresista isip pagtabang sa siyudad.

Nakakita ko sa video bahin sa kusog kaayong baha nga kon wa ko masayop, didto kadto sa lupa nga dapit sa Barangay Labangon, nga hasta ang trisikad gianod pa sa baha nga diha na moagi sa karsada.

Tinuod, kadtong uwan sa miaging Huwebes dili kadto yano lang nga uwan, kay sa wa pa mobunok ang uwan, nalantawan nako gikan diri sa bukid nga akong nahimutangan ang itom kaayong dag-om sa siyudad.

Usa ka nagpailang urban planner miingon nga ang problema kabahin sa baha lisud gyud nga masulbad, ug ang mahimo kuno sa mga opisyal sa kagamhanan mao ra ang pagkontrolar sa baha.

Buyno, posible pud kon ang usa ka dapit nahimutang sa lupa nga bahin kay ang pag-agos sa tubig paingon sa dagat, hinay ra man. Usa sa rason nganong maglunop gyud, kay kusog na ang pag-agos sa tubig.

Gitan-aw nako ang mapa sa siyudad niadtong tuig 1870, halos kayutaan pa ang dapit sa Osmeña Boulevard, ug bisan na sa ubang mga dapit sa dakbayan.

Sa ato pa, motuhop ra ang tubig kon dunay kusog nga pag-uwan. Didto bitaw sa among dapit sa probinsya, bisan pa og bagyo, wa gyud mahitabo nga dunay dapit nga gilunopan.

Ngano man? Kay ang tubig motuhop ra man sa yuta, apan dinhi sa siyudad kay halos tanang dapit nga sakop sa lagwerta sa panimalay gipangsemento na man, aw mao na nga maglunop gyud.

Pero dili kini maayong himoong rason sa atong mga opisyal. Kinahanglan nga mangita gyud sila og paagi nga maiban-ibanan ang problema, kon dili man gani gyud kini masulbad.