BBM dili inosente
Gihatagan sa Ombudsman si kanhi House Speaker Martin Romualdez og 15 ka adlaw pagtubag sa mga kasong plunder ug money laundering nga gipasaka batok niya. Timaan nga nagsugod nang preliminary investigation nga gipasalig ni Ombudsman Boying Remulla.
Base sa tubag nilang Romualdez ug ubang mga sinumbong sa mga ebidensiya nga nipasangil nga nakakawat sila og P56 bilyones sa flood control projects, hukman sa Ombudsman duna bay igong sukaranan sa pagsang-at sa mga kaso batok nila sa Sandiganbayan. Posibleng mahibaw-an na nato sunod buwan madutlan o kublan ba siya sa balaod.
* * *
Giluwatan ang pahibawo sa paglihok sa mga kaso ni Romualdez, kanhi Kongresista Zaldy Co ug ubang mga sinumbong usa ka adlaw human sa State of the Nation Address (SONA) ni Presidente Ferdinand Marcos Jr. Aron tingali pagtubag sa pagduda nga para SONA ra ang pagdali-dali sa pagpasaka sa mga kaso.
Ang paghisgot sa presidente sa mga kaso sa iyang ig-agaw sa SONA igo na untang pasalig nga dili kini paukyab lang. Pero nganong padayon mang gisalikway ang pasalig nga iyang mga paryente ug alyado apil sa imbestigasyon sa eskandalo?
* * *
Walay lalis, si Romualdez ang kinadak-ang isda nga gi-imbestigar. Kay sikit sa presidente, mas importante siya kay nilang Senador Jinggoy Estrada (nga napriso na) ug Senador Chiz Escudero ug Senador Joel Villanueva (kansang mga kaso nga gideklarar ni Remulla nga hinog ug andam nang ipasaka niadtong Mayo nikalit lang og kahilaw ug nibalik sa case build-up karong buwana).
Pero lisod tuohan nga si Romualdez ang kinadak-an. Dili sab matagbaw ang publiko kon kutob ra niya ang pakisusi.
* * *
Sama nga imposibleng dawaton sa mga magbubuhis nga walay labot si Romualdez sa grabeng kinawatay sa iyang sakop nga mga kongresista, wala say mokalawat sa propaganda sa Malakanyang nga walay labot sa eskandalo si Marcos Jr. Duha ray posibleng katin-awan nganong nisulbong ang walay uwaw nga pangurakot:
Una, naghangad sa kisame ang presidente dihang gipirmahan niyang budgets sa 2023, 2024 ug 2025 nga nihatag og tagsa ka bilyon ka pesos nga allocables ug 25% nga kickback sa kada alyado niyang kongresista ug senador; ug
Ikaduha, labaw nilang Romualdez ug ubang mga sinaligan, siya ang labing nabusdik.
* * *
- Latest
