Ang modernong tawo ug ang Franciscano

Duna koy Nakita sa FB nga pagtandi tali sa modernong tawo ug sa usa ka Franciscano.

Ang modernong tawo matud pa namungingi sa mga kabtanganan, salapi, gahom, gadgets ug uban pa.

Puno kaayo ang iyang lawak sa iyang kabtangan apan tensiyonado kaayo siyang nagsud-ong sa iyang mga butang.

Sa laing bahin ang usa ka Franciscano dunay usa lamang ka habito, tau cross, pares nga sandals ug kalinaw.

Malipayon siyang naglakaw ug nagpanaw adlaw adlaw.

Unta dili lang ang mga Franciscano ang makahimo sa ingon kondili ang tanang mga tawo ning atong katilingban.

Dili baya dautan ang paghupot og mga butang materyal labina kun atong hinagoan ug atong ginikanahanglan.

Apan sa sa laing bahin, ang matang sa kinaiya o disposisyon nga atong gihatag niini.

Usahay kita ang nahimong ulipon sa mga kabtangan imbis kita ang moulipon kanila sanglit gihimo man sila alang kanato ug dili kita ang gihimo alang nila.

Sanglit gihimo man sila alang kanato, unta sila magdala kanato ngadto sa kaluwasan ug kalingkawasan ug dili kay mamahimo kitang mag-antos gumikan sa kaulipnan.

Higugmaon nato ang tawo gamiton ang bahandi dili kay gamiton ang tawo, higugmaon ang bahandi. PAX ET BONUM!