EDITORYAL - Nuclear power plant

Nakapurhisyo na og maayo sa tanan kaning pagsige og rotational blackouts, mura og kadudahan na kaayo. Nitiyabaw na gani ang mga negosyante batok niini tungod kay dako sila og alkanse aning kada adlaw nga walay kuryente.

Husto ang plano sa usa ka kongresista nga magpatawag og congressional inquiry bahin ani aron mahibaw-an kung unsa gyuy problema nganong gikinahanglang mag rotational brownouts ug kung unsay solusyon nga kinahanglang buhaton.

Maayo gyud nga subayon kining mga kasamtangang balaod bahin sa enerhiya sa nasud tungod kay basin mao ni ang gipahimuslan pud sa mga namaligya og enerhiya.

Samtang wala pay ebidensiya nga makasuporta sa mga pagdudang tinuyo ni, kaning pagpatawag og congressional inquiry dako ni og matabang para lili-on ang atong mga pamalaod.

Kung naay makitang mga probisyon nga murag alaot ang katawhan, mas maayo wagtangon kini o amendahan. Angay nga ipahaom sa panahon ang mga balaod basi sa kasamtangang sitwasyon nga naa karon ang nasud.

Paspas kaayo ang pagtukod og mga imprastraktura, daghan kaayong mga gamit nga nagkinahanglang padaganon og kuryente apan kuwang ang supply niini.

Karong bag-o, nisibaw ang balitang nagplano ang Department of Energy nga magtukod og nuclear power plants para masuportahan ang panginahanglan sa enerhiya sa nasud.

Tinuod peligroso kaayo ang nuclear power plants, kana kung masayop sa pagpadagan niini ug pagpasagad sa mga hingtungdang ahensiya sa pagsugod palang sa pagtukod niini. Apan kun tarungong lang gyud kini og pahimutang ug pagdala, mas mopaspas ang paglambo sa nasud.

Ang enerhiya dako kaayo og papel sa pagpadagan sa ekonomiya sa usa ka nasud. Naay mga nasud nga abunda og enerhiya tungod kay nag-operate sila og nuclear power plants nga karon paspas kaayo ang pag-asenso.

Kung naay abundang suplay sa kuryente, dako kaayo ang purohan nga mobarato kini para sa mga konsumidor. Kun barato ang enerhiya sa tibuok nasud, motakod ni sa tanang palaliton kay wa nay rason unya ang mga negosyante nga magpaburot og maayo sa ilang presyo/

Dako ni og matabang para sa tanan tungod kay gawas nga momenus ang gastos kada adlaw, magamit pa gyud sa mga tawo ang ilang kwarta sa ubang gikinahanglan nilang gastohan.