Alas ni VP Sara
Sayop si Atty. Lorna Kapunan, usa sa private prosecutors sa impeachment trial ni Bise Presidente Sara Duterte. Nahadlok ko nga siya ang nag-unang ebidensiya nga ang 50 ka tuig nga law practice dili makahimo og bolang kristal. Nga motug-an unsay sunod nga mga lakang sa kaatbang.
Sipyat ang pangagpas ni Kapunan nga walay ebidensiya nga giandam ang defense lawyers ni VP Sara. Nga ang kinakusgan nga depensa mao ra ang walay kinutoban nga objections, panginsulto ug panglawgaw sa tanang mga ebidensiya ug mga testigo nga ipresentar sa prosekusyon.
-o0o-
Mahimong nituo si Kapunan sa pasangil sa iyang kaubanan sa House panel of prosecutors: Nga ang depensa igo lang nangopya sa listahan sa mga dokumento ug mga testigo sa prosekusyon.
Hinaot nga dunay makabasa niini ug makahunghong nilang Kapunan ug kaubanan. Mas andam ang kampo ni VP Sara kay sa ilang gituohan. Angay silang mangandam. Kay paglipat ray tuyo sa orihinal nga lista sa mga dokumento ug mga testigo sa depensa. Ang lista sa tinuod nilang mga ebidensiya ug mga saksi wala ipakita sa pretrial conference aron pagpakurat nilang Kapunan.
-o0o-
Ubos sa lagda sa impeachment court, ang mga ngalan sa surprise witnesses kinahanglan nga ipahibawo sa korte lima ka adlaw sa dili pa mohatag sa ilang testimoniya. Dili kaayo kasaligan namong tinubdan nitug-an nga usa ka semana sa dili pa ang turno sa depensa awhagon ang korte sa pagsupina sa mosunod:
Chairperson George Garcia sa Commission on Elections (Comelec);
Dr. Mahar Mangahas sa Social Weather Stations (SWS);
Ronald Holmes sa Pulse Asia Research; ug
Ranjit Rye sa Octa Research.
-o0o-
Kon naglibog ka unsay ikatabang sa upat nga nalista sa ibabaw sa kawsa ni VP Sara, klarong tua ka kapusta sa prosekusyon. Mosunod ang makapakugang nga mga ebidensiya nga gituohan sa depensa nga makapa-absuwelto ni VP Sara:
Si Garcia supinahan aron dad-on ang orihinal nga kopya (dili photocopy) sa opisyal nga resulta sa 2022 elections nga nagpakita nga kapin sa 32 milyones ang nibotar ni VP Sara; ug
Silang Mangahas, Holmes ug Rye padad-on og kopya sa tanan nilang quarterly surveys nga nagpakita nga si VP Sara ang labing popular nga opisyal sa gobyerno.
- Latest
