Payuhot og sigarilyo

Gihulipan sa kadagkoan sa Bureau of Customs and district collector sa Sugbo nga si Alexandra Lumontad sugod niadtong miaging semana taliwa sa naghitak nga pagpayuhot og sigarilyo dinhi sa Sugbo.

Sigun sa kamandoan nilang Commissioner Ariel Nepomuceno ug Finance Secretary Frederick Go nga pinitsahan og Hunyo 30, 2026, si Lumontad mao nay magsilbing acting director sa Finance Management Office sa Internal Administration Group. Gitudlo nga mohulip niya dinhi sa Sugbo mao si Atty. Zsae Carrie De Guzman. Gikan siya sa Clark isip acting deputy collector for operations.

Way rason nga gihatag nga kadagkoan sa aduana sa kalit nga paghulip ni Lumontad, apan nahitabo ni taliwa sa sunod-sunod nga dakop nga gilusad sa National Bureau of Investigation (NBI) batok sa mga pinayuhot nga mga sigarilyo.

Bisan wala pay tukmang kantidad nga gihatag ang mga awtoridad apan gibana-banang binilyon ka pisos na ang balor sa mga nasakmit nga pinayuhot nga sigarilyo dinhi sa Sugbo. Ang Bureau of Internal Revenue (BIR) mibana-bana nga moabot sab sa P4.36 bilyones ang kantidad sa buhis nga angayan untang bayran sa nga responsabli pagpayuhot sa mga nasakmit nga sigarilyo.

Nagpadayon pa ang imbistigasyon sa mga awtoridad pagsuta kinsay nagpaluyo sa illegal nga kalihukan. Apan basi sa mga dokumento nga nahipos sa NBI gikan sa shipping company, unom ka mga kompaniya ang nalista isip mga shipper. Kini naglakip sa Ryan Surplus, DLA Agrivet Supplies, Astana Hardware and Construction Supplies, Sto Nino Home Equipment, Zion Marine Products and Supplies ug Tandia Cargo Handling Services.

Apan sigun sa akong kasaligan nga tinubdan, posible nga mga peke ang maong mga kompaniya. Kun dili man gigamit lang ni nga pantalya o front sa mga tawo nga nagpaluyo sa smuggling. Sayon ra hinuon ni mailhan kun tinud-on gyud ang imbistigasyon tungod kay duna na may mga pangalan sa shipper. Bisan pa og tugotan ta nga bogus ang maong mga kompaniya apan sigurado ko nga dunay mga tawo nga mibarog isip mga tagdumala nga maoy mahimong sugdan og sukit-sukit sa mga awtoridad aron matugkad kinsay tinuod nga mga nagpaluyo.

Sigun sa intelligence report sa mga awtoridad, posibling mga negosyanteng insik ang nagpaluyo sa maong illegal nga kalihukan apan gisusi pa ni sa pagkakaron.

Sigun sa akong tinubdan, dunay lokal nga kontak ang maong mga negosyanteng insik nga suheto sa pagmaniobra sa ilang kargamento dinhi sa Sugbo. Ang mga nagsilbing local contacts giingong lawom og koneksiyon sa gobyerno o ba kaha naghupot gyud og katungdanan.