Multiple Jobs: Buhay ng Pinoy sa Canada

Maraming Pilipino sa Canada ang may dalawa, tatlo o higit pang trabaho. Isa na itong lumi-
litaw na pattern sa kanilang paggawa sa ibang bansa, batay sa mga datos ng Statistics Canada.

Ayon sa ulat na “Quality of Employment in Canada: Multiple jobholders, 2023” na inilabas noong 2024, humigit-kumulang 8.4 porsiyento ng mga Pilipinong manggagawa sa Canada ang may mahigit sa isang trabaho.

Maraming dahilan kung bakit dumarami ang Pilipinong may multiple jobs. Maaaring dahil sa patuloy na pagtaas ng gastusin tulad ng renta sa bahay, pang-araw-araw na bilihin, gastusin sa anak, at iba pang obligasyong pinansyal, kabilang ang pagpapadala ng pera sa pamilya sa Pilipinas. May mga pagkakataon din na ang pangunahing trabaho ay hindi sapat ang kita o hindi tiyak ang iskedyul, kaya kinakailangan ng dagdag na pinagkakakitaan. May mga kaso rin na ang pagkuha ng ikalawa o ikatlong trabaho ay hindi lamang dahil sa kakulangan sa kita, kundi dahil sa pagnanais na makaipon nang mas mabilis o makakuha ng mas malawak na karanasan sa iba’t ibang larangan ng trabaho. Sa isang maunlad na labor market tulad ng Canada, mas bukas ang oportunidad para sa part-time, seasonal, at gig work, kaya nagiging posible ang ganitong uri ng kombinasyon ng mga trabaho.

Kadalasang nagkakaroon ng ganitong sitwasyon sa mga sektor tulad ng healthcare at social assistance, gayundin sa accommodation at food services. Ayon sa parehong datos, 21.6 porsiyento ng mga Pilipinong manggagawa sa Canada ay nasa healthcare at social assistance, habang 11.2 porsiyento naman ay nasa accommodation at food services. Ang mga industriyang ito ay kilala sa pagkakaroon ng shift work at part-time arrangements na nagbibigay-daan sa pagkuha ng dagdag na trabaho.

Sa ilang pag-aaral, lumilitaw din na ang mga may multiple jobs ay mas madalas na nasa mga hanay ng mababa hanggang katamtamang kita, bagaman hindi ito awtomatikong nangangahulugang maliit ang sahod sa lahat ng kaso. Sa halip, ipinapakita nito ang kombinasyon ng gastos sa pamumuhay, uri ng trabaho, at estruktura ng oras ng paggawa sa loob ng kanilang industriya.

Sa praktikal na antas, ang araw ng isang manggagawa na may dalawa o tatlong trabaho ay maaaring hati-hati sa magkaibang iskedyul—full-time sa umaga, part-time sa gabi, o weekend work bilang dagdag na kita.

Hindi naman malinaw kung alin-alin sa mga propesyon ang may mas mataas na insidente ng multiple jobs, ngunit sa pangkalahatan, mas madalas itong makita sa mga sektor na may part-time, shift-based, at service-oriented na trabaho. Sa mga ganitong industriya, mas flexible ang iskedyul kaya mas nagiging posible ang pagkuha ng dagdag na hanapbuhay. Gayunman, hindi rin ito eksklusibo sa mga mababang sahod o entry-level na trabaho dahil may mga propesyonal din tulad ng mga nurse, guro, inhinyero, at iba pang skilled workers na kumukuha ng karagdagang trabaho sa anyo ng overtime, consulting, tutoring, o part-time practice.

Nakakapagtaka nga kung paano naipagkakasya ng mga Pilipinong ito ang kanilang oras para sa pahinga at personal na buhay. Karaniwan, hindi na rin nila ito ipinapaalam sa kanilang pamilya sa Pilipinas kahit na mahalagang maunawaan ito upang mas mapahalagahan at mas maayos na mapakinabangan ang ipinapadala nilang pera.

* * * * * * * *

Emai- [email protected]