EDITORYAL - Krisis sa Senado

HINDI simpleng bangayan sa pagitan ng ma­yorya at minorya ang nagaganap ngayon sa Senado. Ang pagsabog ng pisikal na komos­yon, lantarang sabotahe sa burukrasya, at ang magkasabay na pag-iral ng dalawang nagtutung­galiang liderato ay opisyal na nagbunsod sa Senado sa malalim na krisis sa Konstitusyon. Ang institusyong dinesenyo upang maging san­digan ng marangal na debate ay nawalan ng kre­dibilidad at naging salat sa moral na awtoridad.

Ang ugat ng kaguluhan ay ang desperadong kapit-tuko sa kapangyarihan. Matapos ang reor­ganisasyon noong Hunyo 3, kung saan ginamit ng bagong mayorya (Solid Bloc 11 at Sen. Francis Escudero) ang Avelino v. Cuenco (1949) upang ideklarang bakante ang liderato dahil ang pag­kakulong ni Sen. Jinggoy Estrada at pagta­tago ni Sen. Bato dela Rosa ay nagbaba sa bilang ng quorum, tumanggi ang kampo ni Alan Peter Cayetano na bumaba. Ang resulta ay krisis ng dual leadership: si Sen. Sherwin Gatchalian bilang Acting Senate President na kinikilala ng Ehekutibo, at si Cayetano na nag­ma­matigas na siya pa rin ang pinuno.

Ang hidwaan ay mabilis na naging pisikal. Upang gupitin ang boses ng pangkat ni Caye­tano na nagpilit magdaos ng pagdinig sa Blue Ribbon Committee ukol sa flood control corrup­t­ion, pinalayas ni Gatchalian ang lahat ng ka­wani ng Senado simula 10:00 ng umaga sa ilalim ng “security policy.” Ganting-diskarte naman­ ng kapangkat ni Cayetano na ipasok ang 18 ex-Marines na testigo bilang mga personal na “bisita” upang iwasan ang panghaharang.

Ang desperasyong ito ay humantong sa ka­hiya-hiyang tulakan sa tapat ng elevator nina Sen. Robinhood Padilla at DILG Sec. Jonvic Remulla. Habang si Sen. Pia Cayetano ay sumi­sigaw upang ipaglaban ang karapatang puma­sok, tuluyan nang nalumpo ang burukrasya. Pinatay ang opisyal na live stream ng Senado at si Alan Peter Cayetano mismo ang nagpanumpa sa mga testigo dahil walang secretariat na sumi­pot, matapos niyang bantaan ang mga emple­yado ng kasong kriminal.

Habang paralisado ang institusyon, ang taum­bayan ang pumapasan ng pinsala. Sunog ang milyun-milyong buwis kada araw para sa Sena­dong mas piniling magtalu-talo. Nakatengga ang mga batas para sa krisis sa langis, anti-hospital detention bill, promosyon ng limang heneral, at naturalization ng mga atleta.

Ang pag-hostage sa pagbabatas para sa pan­sariling agenda ay pagtraydor sa Article XI, Sec. 1 ng Konstitusyon. Ang mamamayan ay nagugutom at binabaha; hindi nito kailangan ang Senadong nagpapakasasa sa kapangyarihan.