Makadaot sa imahe

Nagkadako na kining problema sa mga street dweller nga nagtapok ug nagpuyo sa kadalanan sa uptown area sa dakbayan Sugbo, ilabi na sa palibot sa Fuente Osmeña ug kasikbit nga mga lugar.

Dili ikalimod nga ang hulagway sa mga natulog sa bangketa ug sa mga sidewalk naghatag og dili maayong impresyon sa mga turista ug ubang bisita. Kining maong sitwasyon usa ka klarong "eyesore" nga nagpasabot lamang sa kakulang sa aksiyon sa lokal nga gobiyerno.

Angay na gayud nga mohimo og dinaliang aksiyon ang kagamhanan aron masulbad kining mao nga problema. Ang presensiya sa mga street dweller dili lamang naghatag og negatibong imahe sa syudad, apan nagdala usab kini og risgo sa kaluwasan.

Kinahanglan ang dinaliang koordinasyon sa mga national agency sama sa Department of Social Welfare and Development (DSWD) ug uban pang buhatan aron mahatagan og hustong solusyon kining maong kahimtang.

Ang problema sa kapuy-an ug kakulang sa oportunidad mao ang ugat sa kahimtang sa mga street dweller.

Apan ang pagpasagad usab sa ilang kahimtang makadaot sa reputasyon sa siyudad nga usa sa mga sentro sa turismo ug negosyo sa Visayas.

Ang mga lakang paghatag og temporaryong kapuy-an, livelihood programs, ug mas lig-on nga social services kinahanglan ipatuman sa kagamhanan sa labing dali nga panahon.

Klaro ang mensahe nga  kinahanglang aktibong molihok ang syudad ug ang mga ahensiya sa gobyerno pagsulbad niining nagkadako na nga problema. Kini tungod kay kon pabilin kining mga street dweller, dako kini og epekto sa imahe sa dakbayan Sugbo.