Pulitiko, tapos na ang puro pa-pogi!

Sa loob ng maraming dekada, kinilala ang Senado bilang tahanan ng mga statesman ng bansa. Ngunit tila nagbabago na ang pananaw ng publiko. Habang tumitindi ang mga hamon sa ekonomiya at kabuhayan, mas nagiging mapanuri ang mga Pilipino sa paghusga sa kanilang mga lider.

Ipinakita ng pinakabagong governance survey na isina­gawa ng RPMD mula Mayo 20 hanggang 25, 2026 ang ma­laking pagbabago sa sentimyento ng mamamayan. Nakapagtala ang Senado ng 36.1% Index of Governance (IOG), mula sa 35.4% trust rating at 36.8% performance rating. Samantala, mas mataas ang House of Representatives na may 62.2% IOG, mula sa 61.8% trust at 62.7% performance rating.

Makikita rin ang agwat sa kanilang mga lider. Nagtala si House Speaker Bodjie Dy ng 58.1% IOG, mula sa 57.5% trust at 58.5% performance rating. Sa kabilang banda, si Senate President Alan Cayetano ay nakakuha lamang ng 34.2% IOG, na may 33.9% trust at 34.6% performance rating. Higit pa sa simpleng numero, ipinapakita nito kung paano tinitingnan ng publiko ang kanilang mga institusyon at pinuno.

Ang higit na mahalagang kuwento ay ang bilis ng pag­babago ng opinyon ng taumbayan. Sa panahon ng social media at mabilis na pagkalat ng impormasyon, hindi na ina­abot ng taon bago mabuo o bumagsak ang tiwala ng publiko. Sa loob lamang ng ilang linggo, malinaw na na­ipakita ng survey kung gaano kabilis humatol ang mga Pilipino sa nakikita at nararanasan nila.

Marami sa mga respondent ang naglarawan sa Senado bilang “divided,” “detached,” at “overly politicized.” Totoo man o hindi ang pananaw na ito, malinaw na para sa maraming Pilipino, mas mahalaga ngayon ang mga konkretong solus­yon kaysa sa bangayan at political drama. Habang tumataas ang presyo ng bilihin at humihigpit ang sinturon ng mga pamilya, lumalakas ang panawagan para sa seryoso at tahimik na pamamahala.

Kasabay nito ang mas malakas na panawagan para sa pananagutan. Kapag may mga reklamong isinasampa laban sa mga opisyal ng gobyerno sa tanggapan ni Ombudsman Boying Remulla, hindi ito dapat agad tingnan bilang panggigipit o politika. Trabaho ng Ombudsman na tumanggap at magsuri ng mga reklamo. Walang “bad timing” ang batas at wala rin itong pinipiling posisyon, partido, o apelyido.

Hindi nakapagtataka na nagtala si Ombudsman Remulla ng napakataas na 89.7% IOG, mula sa 89.3% trust rating at 90.2% performance rating. Para sa maraming Pilipino, ang tunay na pagsubok ng liderato ay hindi lamang kung paano mamuno kundi kung paano managot. Kapag may reklamong dapat siyasatin, tungkulin ng Ombudsman na kumilos at tungkulin ng opisyal na sumagot.

Malinaw ang mensahe ng mga numero: pulitiko, tapos na ang puro pa-pogi. Unti-unti nang tumatalikod ang mga Pilipino sa pulitikang puro ingay at pagpapasikat. Ang umuusbong ngayon ay ang performance voter—isang botanteng mas tumitingin sa resulta kaysa salita, sa serbisyo kaysa drama, at sa gawa kaysa pangako. Sa bagong panahon ng pulitika, performance, hindi political theater, ang bagong sukatan ng tunay na liderato.