Best friends hangtud sa kamatayon

Dili basta-basta nga kamatayon ang nahiaguman sa mag-siete anyos nga mag-best friends nga silang Remart Cunag ug Jeff Xian Abellar sa Barangay Tuyan, Dakbayan sa Naga. Hilabihan ang ilang pag-antos hangtud nga nabugtoan sila sa kinabuhi human masirad-an sa usa ka abandonadong awto sa sulod sa usa ka parking area.

Posibleng nagduwa-duwa ang mga bata ug misulod sa sakyanan, apan kalit lang kining na-lock ug wala na sila kahibalo kon unsaon pag-abli. Tungod kay tinted kaayo ang maong awto ug mingaw ang parking area, wala silay nakuhang tabang gikan sa gawas. Sa kainit sa panahon, daw anaa sila sa sulod sa oven nga naka-low heat; inanay silang giluto nga buhi sa sulod sa sakyanan. Dili nato ma-imagine ang kalbaryo sa duha ka anghel nga naningkamot nga makaginhawa hangtud nga tuloyan silang nabugtoan sa kaginhawaan. Pagkasakit kaayo pamalandungon ang nahitabo kanila.

Niadtong Mayo 17 ang uwahing higayon nga nakita sila sa ilang mga ginikanan. Tungod kay managsilingan ra, dungan silang gipangita apan napakyas ang pamilya hangtud nga mitaho na lang sila sa kapolisan, diin nagsugod ang imbestigasyon.

Pinaagi sa CCTV nga nakuha sa balay nga atbang sa parking area, nakita ang duha ka bata pasado alas dos sa hapon niadtong Mayo 17 nga padulong mosulod sa parking area. Bisan pa kon dili klaro ang mismong pagsulod nila sa awto, mao kini ang naghatag og lead sa kapolisan sa pagtultol sa nahimutangan sa mga bata. Tungod kay nanimaho na ang dapit, nasuta nga anaa sa sulod sa sakyanan ang mga biktima nga anaa na sa state of decomposition.

Mayo 20 na sa dihang napalgan ang ilang mga lawas. Tungod kay nadugta ug nanimaho na, gideretso dayon kini paglubong, ug wala ra mosupak ang pamilya sa sinugdanan tungod sa kakurat. Apan karon nga nahuwasan na sila sa grabeng shock, gusto na nilang ugkaton og balik ang patayng lawas sa mga bata aron ipa-autopsy tungod kay gusto nilang masayran kon unsa gyud ang tinuod nga hinungdan sa kamatayon.

Gawas pa, gusto sa pamilya nga mapabendisyonan man lang ang mga lawas sa mga bata. Dako ang ilang pagbasol nga gipalubong dayon kini nga wala man lang giagi sa simbahan—daw sama lang kuno sa mananap nga gilubong dretso.

Gusto sa pamilya nga masud-ong ang mga bata sa kataposang higayon, bisan og puston man lang ang ilang lungon. Pagkasakit gyud sa nahitabo: nag-antos na ang ilang lawas sa buhi pa, unya ang ilang kalag daw dili usab mahiluna kay wala man mahatagi og bendisyon o bisan mapahinungdan man lang og pag-ampo. Sa initial investigation sa kapolisan, walay foul play ang kamatayon sa duha ka mga bata. Hinuon, padayon pa ang ilang pagsusi kon kinsa ang adunay tulubagon: ang mga ginikanan ba nga nakulangan sa pagbantay, o ang tag-iya sa abandonadong sakyanan? Angayan usab susihon kon nganong naabli sa mga bata ang sakyanan—wala ba diay kini gi-lock sa tag-iya?

Bisan kon walay krimen o foul play, angay gihapon nga sutaon sa gobiyerno ang tulobagon sa tag-iya sa abandonadong sakyanan. Ang pagbiya sa usa ka delikado ug daling masulod nga kagamitan sa usa ka publiko o semi-publikong dapit usa ka lapso sa seguridad nga angayng adunay tulubagon ubos sa balaod.

Ang trahedya sa Naga usa ka masulub-ong leksyon alang sa tanang ginikanan ug komunidad nga dili gyud angay kumpyansahan ang kaluwasan sa mga bata. Sa pagtimbang-timbang niini nga isyu, ang labing maayong dalan mao ang pagpangita sa kamatuoran pinaagi sa legal ug siyentipikanhong paagi, samtang nagpabiling mabinantayon sa kaluwasan sa mga buhi. Ang hustisya alang kang Remart ug Jeff Xian dili lang makab-ot sa pag-abli sa ilang lubnganan, kondili sa pagsiguro nga ang ilang gidangatan dili na masubli sa uban pa nga kabataan.