Dili angay kaloy-on

Angay ba gud nga kaluy-on ang mga iro nga anha mag-standby sa karsada ug kon dunay tawo nga moagi nga maglakaw, ug bisan na gani og magsakay’g motorsiklo ug tricycle, ilang tabangan og gukod kay paakon?

Didto sa lungsod nga gitawag og Ramon, sakop sa probinsya sa Isabela, sa Luzon, dunay duha ka iro nga gipasagdan lang sa tag-iya nga anha sa karsada manggukod og mga tawo.

Dunay video nga gipakita pinaagi sa footage sa CCTV nga kada agi sa mga magmotor, ug dunay tricycle, tabangan gyud og gukod sa duha ka iro kay paakon nila ang nagsakay.

Luoy tawon kaayo ang duha ka tawo nga nagsakay og motor nga direyot gyud mapaaki, maayo na lang nga nakapakusog kini pagpadagan ug nakalikay sa ngipon sa iro.

Wa danti og dos minutos, mibalik ang motor ug gisugat na sab sa duha ka iro, apan wa na mahadlok niining higayona ang nagsakay, ug ang nag-angkas sa motor mipusil sa iro.

Nakita gyud sa CCTV nga nag-uwaol ang iro midagan human maigo sa bala. Patay gyud ang maong iro. Ang kaubang iro, pagkakita sa gidangatan sa iyang kauban, nahadlok ug wa na moduol.

Pangutana, angay ba gud kaluy-on ang mao nga mga iro? Kaniadto nakasuway gyud ko nga kanunay ko nga gukdon sa iro inig-agi nako sa duha ka lugar dinhi sa Cebu City ug didto sa probinsya.

Ayaw na lang mo pangutana og giunsa nako ang iro nga manggukod, basta wa nay nangatang pagkaugma.

Dunay uban nga “dog lover” kuno, moingon sayop kuno ang gihimo sa duha ka tawo, tawgon ra kuno ang atensyon sa tag-iya nga ipaatiman ang ilang iro.

Pastilan, huwata nga kamo'y makasuway nga gukdon mo og iro samtang mag-drive, tan-awon nato og di ba molayas ang inyong espiritu sa kahadlok ug anha pa kamo makaingon nga husto ko sa akong baruganan.

Dunay balaod nga ang mga iro dili gyud buhi-buhian, ug kon dad-on kini sa public place sa nag-atiman sa iro, kinahanglan nga iyang hig’tan aron nga dili makapaak.

* * *

Gitataw sa kadagkoan sa International Criminal Court (ICC) nga dili tinuod nga nagpagawas na sila og warrant of arrest aron ipadakop si Senador Ronald “Bato” Dela Rosa.

Apan bisan pa niini, wa kini makawagtang sa kahadlok ni Bato, ug padayon kining nagtago, ug wa na gyud moapil sa sesyon sa Senado sukad kaniadtong Nobiyembre 2025.

Sukwahi sa iyang hinambog kaniadto nga dili siya mahadlok kon dakpon ug andam siyang moatubang sa ICC. Karon, halos anino di na makit-an kon hain magtago.