EDITORYAL- Estratehiya ba ni?

Nipahibalo ang lead counsel ni kanhi presidente Rodrigo Duterte nga si Nicholas Kaufman nihangyo sa International Criminal Court (ICC) nga tugotan siyang mo- withdraw sa paglaban sa kanhi lider tungatunga aning preparasyon sa pagdungog sa kaso.

Wala pay tubag ani ang ICC Trial Chamber III, nga maoy naghupot sa three counts nga crimes against humanity batok kang Duterte.

Gawas ni Kaufman ni-withdraw sab ang associate counsel ni Duterte nga si  Dov Jacobs, tungod daw kay mao ni kabubut-on sa kanhi presidente kay gusto niining i-reorganize ang iyang legal team para sa trial.

Daghang mga espekulasyon bahin sa pag-withdraw ni Kaufman ug ni Jacobs. Usa niini, kabahin ni sa estratehiya sa depensa para makapangandam og maayo sa ilang mga ebidensiya ug mga tubag batok sa mga pasangil.

Apan dili sab kalikayan nga dudahan kini nga paagi aron madelatar pa gyud og maayo ang paghusay sa kaso.

Sa pagkakaron naa nay tulo ka mga hukom nga natudlo aron maoy mohusay sa kaso ni Duterte, usa nila, bag-ohay lang nikombikto og warlord sa Africa nga nalambigit sa mass genocide ug war crime.

Ang kaso sa kanhi presidente may kalabotan ni sa dugoong war on drugs ubos sa iyang administrasyon gikan sa tuig 2016 hangtud 2019 ug sa dihang mayor pa siya sa Davao City.

Ang Philippine National Police mismo mibutyag nga basi sa ilang talaan, dunay moabot 3,000 ka mga drug suspects ang napatay atol sa gipangusgang kampanya kontra ilegal nga drugas.

Napatay sila tungod sa matud pa pagsukol nila sa mga polis, apan lahi ang estorya sa mga pamilya sa mga napatay ug sa mga testigos.

Pipila sa mga napatay mga batang estudyante nga napagan sa operasyon ug duna say napatay nga gitamnan og ebidensiya sa mga polis.

Si Duterte daan ng misaad nga iyahang duphan ang mga tigpatuman sa balaod sa ilang mga operasyon batok sa ilegal nga drugas.