BSKE postponement

Gituki na sa House Committee on Suffrage and Electoral Reforms ang anaa sa napulo ka mga sugyot balaudnon nga maguswag sa Barangay ug Sangguniang Kabataan Elections nga gikatakda unta karong Nobyembre 2, 2026.

Ang chairman sa Committee on Suffrage and Electoral Reforms nga si Kongresista Alonto Adiong mipasalig nga ila nang masumitir ang committee report sa sugyot balaudnon sa dili pa mapopos kining buwan sa Agosto.

Ang problema lang sa mga sugyot balaudnon nga gituki sa komitiba ni Adiong kay gititulohan og Postponement of Barangay ug Sangguniang Kabataan Elections tungod sa krisis sa enerhiya, gubat sa middle east, pagmahal sa mga palaliton, bagyo ug linog nga miguba sa mga tunghaan. Sa tunghaan man god himoon ang election.

Titulo pa lang sa sugyot balaudnon moisa na ang kilay sa mga mahistrado sa Korte Suprema tungod kay dili kini makapasar sa mga patakaran nga gilatid sa Korte Suprema mahitungod sa paguswag sa Barangay ug Sangguniang Kabataan Elections.

Aron dili madeklarar nga illegal o unconstitutional ang gisugyot nga balaudnon, kinahanglan nga usbon sa nagsugyot niini ang titulo sa ilang gisugyot nga balaudnon, ina kay postponement, term fixing ang himuon nilang titulo sa ilang gisugyot nga balaudnon. Kining ako tambag lamang ngadto sa mga kongresista bisan tuod wala nila kini pangayoa.

Kun ugaling dili nila usbon ang titulo sa gisugyot nga balaudnon klaro kaayo nga maglisod kini sa pagbarog sa Korte Suprema kun ugaling adunay mohagit sa legalidad niini.

Makalangay usab sa pag-abot ngadto sa opisina sa Presidente ang balaudnon tungod kay masangit pa kini sa Bicamiral Committee aron hanayon ang nagbangi nga version sa balaudnon.

Ang dili pag usab sa titulo sa gisugyot nga balaudnon sa mga kongresista pagpakita kini sa dili nila pagkasinsiro sa pag uswag sa BSKE. Atik-atik ra ang ilaha.