Kinawatay ug pinatyanay
Kasalawayon ug ka walay uwaw sa liderato ni Bise Presidente Sara Duterte nga naklaro na atol sa ika-16 nga adlaw sa iyang impeachment trial sa Senado niadtong Lunes:
Siya ra ang nagbuot-buot sa paghimo sa iyang kaugalingong mga lagda sa mga transaksiyon nga gisudlan ginamit ang pundo sa gobyerno; ug
Iyang mga sinaligan naglumba og sunod sa bisan unsay iyang gisugo bahala na kon, tungod sa ilang kasinatian, silay labing nahibawo nga nayatakan ang batakang mga lagda sa pagtarung og gasto sa kuwarta nga hinagoan sa labing kabos sa katawhan.
* * *
Gisugo ni VP Sara si Gina Acosta, kanhi special disbursing officer (SDO) sa Office of the Vice President (OVP), sa paghatag sa P500 milyones nga confidential funds ngadto ni Koronel Dante Lachica, kanhi hepe sa Vice Presidential Security and Protection Group (VPSPG).
Dili makasulti si VP Sara nga wala kahibawo sa lagda nga ang confidential funds mahimo lang tipigan ug gastuhon ni Acosta. Sa pagkolekta sa kinadak-ang confidential ug intelligence funds sa tanang syudad sa Pilipinas dihang siyay mayor sa Davao City, epektibo nang joint memorandum circular nga naumol sa 2015.
* * *
Si Acosta suhito sab sa lagda. Isip kanhi SDO sa Davao City Hall sa wala pa dad-a ni VP Sara sa OVP. Kakuyaw kon samang kalapasan gihimo sab nila sa Davao, ug gi-isnab sab nila ang pagbadlong sa Commission on Audit (COA).
Taas nga ranggo ni Lachica nakatudlo gyod tingali niya nga dili mapugos pagtuman sa ilegal nga sugo. Wala siyay gahom sa pagtipig ug paggasto og bisan usa ka dako sa makalilisang nga confidential funds.
* * *
Tingali si VP Sara dunay giliwatan. Igo lang tingaling gisunod unsay ilang naandan. Nga inutil ang mga lagda sa COA, o sa bisan unsang ahensiya sa gobyerno, batok sa ilang kahawod.
Duna na tay ideya unsay mahitabo kon makabalik ang mga Duterte sa Malakanyang. Sama nga gipasidan-an na ta pero wala lang gyod kapugong sa pagbalik sa mga Marcos sa palasyo. Karong nabiktima na sa pagsulbong sa pangurakot sa administrasyon ni Marcos Jr., nga nilabaw pa sa kinawatay atol sa diktadura ni Marcos Sr., hinaot nga dili na motugot sa mas grabe pang kinawatay ug bangis pang pinatyanay.
* * *
- Latest
