EDITORYAL - Republic Act 10586 amendahan

Usa ka balaudnon ang giduso karon sa Senado aron amendahan ang kasamtangang Republic Act 10586 o ang Anti-Drunk and Drugged Driving Act of 2013.

Ang RA 10586 usa na unta ka lig-on ug kompleto og ngipon kontra anang mga abusadong mga drayber. Apan sama sa ubang mga balaod nga napasar dinhi sa nasud, wala kaayo maimplimentar og tarong sa mga tigpatuman niini.

Usa sa mga sanglitanan ani, kaning kakulangon sa mga alcohol breath analyzers nga gamit kaayo sa imbestigasyon sa mga aksidente sa kadalanan.

Si Senador Chiz Escudero niduso og balaudnon nga nagtinguhang amendahan ang kasamtangang napulo na ka tuig nga RA 10586 tungod ni sa daghang mga aksidente sa kadalanan nga wala magkadimao ang imbestigasyon nga niresulta sa paghikaw sa hustisya para sa mga biktima.

Giduso ni Escudero ang Senate Bill No. 2078 niadtong Mayo 4, nga giulohan og “An Act Strengthening Mechanisms Against Driving Under the Influence of Alcohol, Dangerous Drugs, and Other Similar Substances.”

Ang tumong ani mao ang pagsulbad sa mga kakulangan sa implementasyon sa balaod nga maoy gitumbok nganong daghang inhustisya sa mga kaso sa mga aksidente sa trapiko.

Subay sa kasamtangang balaod, kung dunay aksidente sa kadalanan, otomatiko gyud dayung ipaubos sa alcohol ug drug test ang mga nalambigit nga drayber diha gyud mismo sa nahitaboan, kana kun wala sila madala sad og ospital tungod sa pagkaangol.

Apan tungod kay dili tanang mga makarespondeng mga otoridad sama sa mga polis nagbitbit kanunay og breath analyzers, sagad malangay ang paghimo niini ug ang pinaka-grabe malimtan nalang gyud kini ug dili na maapil sa police report nga makapalig-on unta sa kaso batok sa nakasala nga drayber.

Mas labing maayo ani nga balaudnon, kinahanglang obligahon sab ang tanang mga tambalanan, publiko man o pribado nga maghimo og alcohol ug drug test sa tanang mga drayber nga malambigit sa disgrasya kun kini dad-on diha sa ilang mga tambalanan.

Kana aron dili matago sa mga drayber nga nalambigit sa aksidente ang tinuoray nga estado sa ilang panghunahuna atol sa pagka-aksidente.

Pinaagi ani mahibaw-an kun nakainom o high ba sila sa illegal nga drugas nga pwedeng gamiton para mapalig-on ang kaso ug mapanubag ang angay nga manubag.