Kamaabi-abihon ug pagpakaaron

Di gyud dautan ang mangandam ug maningkamot nga mobilib ang atong mga bisita gikan sa laing nasud nga motambong sa ASEAN Leaders’ Summit dinhi sa Sugbo. Kinaiya sa mga Pilipino, labi pa sa mga Sugboanon, ang pagkamabiabihon.

Nahinumdom ko sa mga karaan nga kun dunay bisita manggawas ang mga tinagoan nga plato, kutsara ug baso. Kun dunay moabot nga bisita ug anha mohigda sa panimalay, ang labing nindot nga kwarto maoy pahigdaan ug ang mga bag-ong unlan, punda ug habol ipagawas.

Sa ako nang giingon dili ni dautan apan ang problema mao nga daghan ang nagtuo nga ang pagpakaaron-ingnon kabahin gihapon sa maayong hiyas pagkamaabiabihon. Dako og kalainan ang pagpakaaron-ingon sa pagkamaabi-abihon.

Usa sa maayong sanglitanan sa pagpakaaron-ingon nga nagmaskara sa pagkamaabi-abihon mao ang gihimo sa mga dakbayan sa Sugbo ug Lapu-Lapu nga pagtaptap sa tinuod nga mga talan-awon aron pagpabilib sa mga bisita nga ania sa Sugbo alang sa ASEAN Summit.

Gitabonan sa syudad sa Sugbo ang kahugaw sa Pasil ug Ermita pinaagi sa pagbutang og mga tarpaulin diha sa viaduct aron di makita sa mga moagi nga mga bisita. Tingali alang sa pamunoan sa dakbayan sa Sugbo, mas dali ang pagtabon kaysa pagpanglimpiyo.

Ang dakbayan sa Lapu-Lapu mihakot sab sa 66 ka pamilya nga nagpuyo duol sa venue sa Summit paingon sa usa ka resort didto sa Cordova. Gamit ang seguridad sa mga delegado sa ASEAN isip ilang lansis, gipabakasyon sa gobyerno ang mga nagpuyo duol sa Mactan New Town sukad niadtong Abril 27 hangtod sa Mayo 9.

Ug nakatag-an mo, gasto sa mga magbubuhis ang ilang bakasyon apil na ang ilang pagkaon. Wala pay opisyal nga pamahayag ang kagamhanan pilay nausik nga buhis sa katawhan niining ilang pagpakaaron-ingon. Apan ang presyo sa kwarto sa resort diin gibutang ang 66 ka mga pamilya nagkantidad og P1,500 hangtod sa P5 mil ang matag-adlaw. Kamo nalay kwenta pila ka kwarto ang gipuy-an sa 66 ka pamilya ug kun pilay posibling bayranan sukad niadtong Abril 27 hangtod sa Mayo 9.

Kwarta nga mahimo unta nga magamit sa mas importante nga mga butang kaysa pagpakaaron-ingon. Wala ni kalainan sa usa ka garbosong tawo nga bisan way mahimo mangutang oron igasto og kumbira aron sa iyang silingan pagakpakan.