EDITORYAL — Tax relief  dakong tabang

Daghang mga maayong balita nga gipaabot sa ikalimang state of the nation address (SONA) ni Presidente Ferdinand Marcos Jr. kagahapon, Hulyo 27 sa Batasang Pambansa.

Apan ang usa sa mga labing maayong giestorya niya mao ang tax break para madako-dako pa ang madalang kita sa mga middle class income earners.

Gusto ni Marcos nga katong mosweldo og suma total  P350,000 kada tuig dili na pabayron og income tax. Sa pagkakaron, exempted pagbayad og buhis ang gasweldo og P250,000 kada tuig.

Apil sa gusto niyang i-exempt sa  minimum corporate income tax katong mga ginagmay nga negosyo kay para niya dako ni karon og matabang sa mga tawo karon nga naay tension sa Middle East.

Gusto sab niyang pahatagan og tax amnesty katong mga wala pa nakabayad sa ilang income tax, estate ug donor’s tax, ug ingon man value-added tax.

Ang buhis maoy nagbuhi sa gobiyerno para naay magamit sa pagpadagan sa nasud, dinhi gikan ang ipamalit nga mga gamit, pagtukod og mga proyekto, seguridad, sweldo sa mga kawani sa gobiyerno, pangbayad sa mga obligasyon ug uban pa.

Dako kaayo ni og matabang para sa mga middleclass income earners ug sa mga ginagmay nga negosyo.

 Makapuno ni sa take home pay sa mga mamumuo para sa ilang pamilya.

Dili popular nga presidente si PBBM tungod aning mga dagkong problemang giatubang sa iyang administrasyon ilabi na bahin sa kurapsyon nga sa iyaha gipasangil sa pipila ka nga hut-ong nga daan ng dili ganahan niya. Walay perpektong presidente, samot ng dili perpekto ang mga tawo.

Pero ang tax relief nga gusto niyang ipatuman, mabulahan ang tanan apil ang mga dili ganahan sa iya.

Wala nay makuha ang presidente gikan aning iyang mga gibuhat para sa katawhan kay dili naman siya puydeng magpa reelect sa 2028.

Busa, kung unsa may kaayohang mahatag niya ug makatabang sa kinabag-an sa mga Pilipino, angay kining ipasalamat.              

Apan kinahanglang dili molugak ang katawhan sa pagbantay ug pagkontra sa mga kahiwian diha sa gobiyerno kay anang paagiha lamang nga makapaabot ang mga Filipino og tarung nga serbisyo kun sila magmabinantayon ug magpakabana ug dili lang pamolitika.