Sipyat lang gyud

Giusab na sa hukmanan ang nahimong sayop sa pag-isyu niini og warrant of arrest sa kaso nga paglapas sa Cybercrime Prevention Act of 2012 batok kang Jose Yumang Sonza nga naila sa Jay Sonza.

Nahimong kontrobersyal kining kaso ni Jay Sonza kay gipasakaan siya'g kaso tungod sa pag-ingon nga masakiton si Presidente Marcos, unya dihang gidakop kini, gibutang sa warrant og arrest nga non-bailable ang kaso.

Apan giangkon sa hukmanan nga duna lay sipyat sa pagpreparar sa warrant of arrest. Ang kaso gud ni Jay Sonza (usa sa mga anchors sa TV program nga Mel & Jay) gibutang man nga kalapasan sa Republic Act 10591, imbes Republic Act 10951.

Ang Republic Act 10591 balaod kini kabahin sa mga armas (Firearms Law), samtang ang Republic Act 10951 mao ang balaod nga nag-amendar sa Article 154 sa Revised Penal Code (Unlawful Means of Publication as amended by R.A. 10951)

Mao kini ang kaso nga giingong nalapas ni Sonza ug kay gipublikar man niya sa internet ang iyang pamahayag bahin kang Presidente Marcos, mao na nga nalambigit usab kini sa Cybercrime Act.

Karon, makabutang na og P10,000 nga piyansa si Jay Sonza ug ang arraignment gani sa iyang kaso gitakda karong adlawa.

May nangutana kon mahimo ba nga masilotan ang huwes nga nakahimo sa maong sayop pagbutang nga dili mapiyansahan ang kaso ni Jay Sonza?

Ang tubag, dili. Kon way malisya ang paghimo huwes, ug maisip lang gyud nga ordinaryo lang nga sipyat sa huwes, unya diha nga natan-aw nga sayop diay ug gihimoan dayon kini og koreksyon, dunay Supreme Court jurisprudence niini nga dili ra masilotan ang huwes.

Pero kon pananglit gibarugan gyud sa huwes nga bisan og siya nasayop, ingnon gyud niya nga kini maoy husto, diha na mosulod ang Ignorance of the Law ug masilotan ang huwes niana.

* * *

Pastilan, karong adlawa gikatakda nga moumento na usab ang presyo sa krudo ug gasolina. Matud pa nga ang krudo usbawan og 40 ngadto sa 70 sentimos kada litro, ug ang gasolina P1.30 ngadto sa P1.70 kada litro.

Tag P77.80 na lang unta ang presyo sa krudo nga gibaligya sa gasoline station nga maoy sagad nakong palitan og fuel sa akong sakyanan. Mas barato kini og mga P5 kon itandi sa presyo sa kakumpetensya nga gas stations.

Ambot kanus-a kaha mobalik ang naandang prisyo. Si United States President Donald Trump nagsige ra ba og bahad nga pulboson gyud kuno niya ang Iran. Kini maoy nakaingon sa grabeng pagsaka sa prisyo sa fuel.

Daghang nasud ang naamong niining pagpangatake sa Israel ug US ngadto sa Iran kay wa na man kaayo makaagi ang mga oil tanker sa Strait of Hormuz mao nga minihit ang krudo ug gasolina, ug mimahala ng presyo.