EDITORYAL- Enerhiya sa Sugbu

Sa paglambo sa usa ka lugar, sama aning Central Visayas nagkadako pud ang panginahanglan sa enerhiya kay mao man ni ang mopadagan sa mga makinarya nga gikinahanglan.

Ang Cebu mao ang pinaka-malambuong probinsya sa Central Visayas mao nga usa ni sa mga dako og kaon sa kuryente. Dili kini maingon ani kung dili tungod sa stable nga suplay sa kuryente.

Unya karon daghan pa kaayong padayung gipangtukod nga mga high buildings nga kung makompleto na magkinahanglan sab og enerhiya.

Niadtong Biyernes, Abril 24,2026 sa gihimong Power Forward Visayas Forum nga gipasiugdahan sa The Freeman ug Banat News , si Gob. Pamela Baricuatro mibutyag nga nagkinahanglan karon ang tibuok probinsya og 150 megawatts nga supply sa kuryente.

Sa pagkakaron, ang 60 porsiyento sa enerhiya sa Sugbu nagagikan sa laing lalawigan konektado pinaagi sa Cebu-Negros-Panay Backbone and Mindanao-Visayas Interconnection Project (MVIP) sumala pa sa National Grid Coporation of the Philippines (NGCP). Ang uban gikan sa lokal nga mga power producers nga nigamit og fossil fuels o petrolyo.

Mao nga bisan unsang inisyatiba nga magagikan o anhi gyud buhaton sa Sugbu para mapun-an kining suplay makadugang kini sa garantiya para sa malungtarong pagpadayun sa mga kaugmaran sa Sugbu.

Usa ani kanang gitinguha ni Baricuatro nga 150-megawatt solar project ug ang Alegria gas field kay kung makompleto ni makapuno gyud ni sa panginahanglan sa enerhiya sa Sugbu.

Sa pagkakaron, ang pinakamaayong tinubdan sa kuryente mao ang renewable energy nga dugay na kaayong gihisgutan sa gobiyerno apan wala pa gyud makab-ot.

Ang target sa gobiyerno nga sa tuig 2040, moabot na og 40 ngadto sa 50 porsiyento sa enerhiya sa nasud magagikan sa renewable energy aron dili gyud tanan magsalig sa petrolyo. Ilabi na pirme ning maapektahan sa mga krisis sa kalibutan sama sa Middle East.

Apan sa reyalidad ani, nagsalig lang ang gobiyerno sa mga pribadong kompanya para maoy mamuhonan pagptukod og mga planta para sa renewable energy.

Nakatampo nganong kuwang og interes ang uban nga mamuhonan sa renewable energy  tungod kasamtangang polisiya nga dili puydeng 100 porsiyentong panag-iyahon og mga langyaw nga kompanya.

Kinahanglan gyud tingaling rebisahon ug usbon ang mga polisiya ug mga balaod para sa kasigurohan sa enerhiya sa nasud