EDITORYAL - Problema sa droga lalo pang lumubha
MALAKI ang problema sa droga. Halos araw-araw, may mga nakukumpiskang shabu na nagkakahalaga ng bilyong piso. Ang nakapagtataka, hindi naman nahuhuli ang mga big time drug lord. Pawang mga maliliit na drug pushers ang nahuhuli. Hindi rin mabatid kung saan nanggagaling ang shabu.
Kamakailan, isang toneladang shabu ang nakumpiska ng mga awtoridad sa Puerto Galera, Oriental Mindoro. Nakalulan sa isang bangkang de-motor ang shabu. Naispatan ng mga awtoridad ang bangkang de-motor sa laot habang umaaligid naman dito ang isa pang bangkang de-motor. Nasiraan pala ang bangkang de-motor at sinasaklolohan ng ikalawang bangka. Agad tumakas ang ikalawang bangka nang makitang papalapit ang mga awtoridad. Nang inspeksiyunin ang nasirang bangka, nakita rito ang bultu-bultong shabu. Inaresto ang dalawang Chinese.
Ayon sa mga awtoridad, galing Batangas ang bangkang may kargang shabu nang masiraan ng makina sa laot. Sumaklolo ang ikalawang bangka pero hindi na nila nailigtas ang dalawang Chinese drug traffickers sapagkat dumating na ang mga awtoridad. Nahuli rin ang mga sumaklolo na kinabibilangan ng dalawang Pilipino.
Hindi ito ang unang pagkakataon na may mga nahuling shabu sa laot. Noong nakaraang taon, maraming parcel ng shabu ang nakitang palutang-lutang sa karagatan ng Pangasinan, La Union, Zambales at iba pang bahagi ng West Philippine Sea (WPS). Ang mga mangingisda ang nakasagip sa mga palutang-lutang na shabu. Ang mga pakete ay may nakasulat na Chinese characters.
May mga nasagip ding parcel ng shabu sa karagatang sakop ng Quezon Province at may Chinese characters din ang mga ito. Mga mangingisda rin ang nakasagip.
Lalo pang lumubha ang problema sa droga sa bansa. Ang problemang ito ang ipinangako ni dating President Rodrigo Duterte nang maupo sa puwesto noong 2016. Sabi niya, sa loob ng anim na buwan, lulupigin niya ang drug problem sa bansa. Ipinatupad niya ang Oplan Tokhang kung saan kaliwa’t kanan ang ginawang pag-aresto sa mga suspected drug pushers. Maraming napatay sa drug operations.
Pero sa kabila ng Tokhang operations, hindi nalutas ang problema sa droga. Lalo pang lumubha. Hindi maubos ang shabu. Tone-tonelada na nagkakahalaga ng bilyong piso. Hindi nagkatotoo ang pangako ni Duterte.
Noong Miyerkules, sa pagpapatuloy ng impeachment hearing ni Vice President Sara Duterte, inihayag ni dating Senador Antonio Trillanes na tumanggap ang pamilya Duterte nang milyun-milyong piso mula sa drug lord na si Sammy Uy. Idinideposito ni Uy ang pera sa account ni Digong, sa mga anak at sa dating common law wife nito.
Ngayon, malinaw na kung bakit hindi nalutas ang problema sa droga sa panahon ni Duterte. Nakita ang agos ng pera mula sa droga patungo sa kanilang account.
- Latest
