Pangbudol ug panghunaw

Gipahibalo ni Presidente Bongbong Marcos Jr. mismo nga gidakop didto sa Prague, Czech Republic si kanhi kongresista Zaldy Co tungod sa iyang pagsulod sa nahisgotang nasud nga walay mga dokumento. Ang presidente nagkanayon nga anaa sa kustodiya sa gobyerno sa Czech Republic si Zaldy Co.

Tungod niini, usa ka opisyal sa gobiyerno ang mipalupad sa iyang Chief of Staff nga si Jess Lapus nga nagbakasyon sa Milan aron susihon ug mahikotar dayon ang pagpapauli ni Co dinhi sa nasud. Apan walay gidakop kuno  nga Zaldy Co sa nahisgotang nasud matud pa sa Ministry of Justice sa nahisgotang.

Nangbudol napod si PBBM o nabudol lang pod kini sa naghatag kaniya og kasayoran? Gituyo ba ang paghatag og sayop nga kasayoran ngadto sa Presidente aron mahimo siyang makaluluoy sa mata sa katawhan?

Seguro ko nga ang naghatag sa Presidente og sayop nga kasayoran iya gyod kini nga kasaligan tungod kay siya gyod mismo ang mipahibawo sa giingong pagkasikop ni Co ug dili ang iyang tigpamaba nga si Atty.  Claire Castro.

* * *

Nanghunaw si kanhi House Speaker Martin Rimualdez sa pasangil nga siya ang utok sa budget insertions ug ingon man sa pagkawat sa budget sa flood control project. Gipasabot ni Romualdez nga ang opisina sa Presidente maoy nagduso sa budget ug dili lang siya ang midisidir sa budget.

Gawas sa House of Representatives anaa pa ang Senado, small committees ug bicameral committee ingon man ang Presidente nga maoy mipirma sa balaud. Dili pod ang mga magbabalaud ang nagpatuman sa balaud kun dili ang Presidente ug ang DPWH. Giawhag ni Romualdez ang Ombudsman sa pag imbestigar ug sa imbestigasyon niini kinahanglan nga dili kini magpili og imbestigahon.

Nanghunaw na si Kongresista Martin Romualdez. Mora’g si PBBM ang iyang gipasabot. Kamo, unsay inyong sabot?