EDITORYAL - I-ban ang Facebook

Tungod sa pagkuyanap sa mga bayolenteng mga contents ug ingon man mga fake news, disinformation, misinformation gamit ang social media, nabuhi nasab og balik ang mga tinguhang i-ban kini dinhi sa Pilipinas.

Sensitibo ug talandugon kaayo ni nga isyu karon tungod kay halos tanang mga Pilipino naay mga social media accounts.

Gigamit kini sa ilang personal nga mga katuyoan para malingaw, komunikasyon, tinubdan sa mga maayo ug tinuoray nga impormasyon ug uban pa.

Sa laktod, giabusaran ang kalugak sa kompanyang nag-operate aning mga social media platforms ug nakamugna na hinuon og kasamok, kaguol, kasakit, kauwawan, ug peligro sa publiko.

Sama nalang aning sikat ug maoy pinakadaghan og users nga Facebook, tinuod makalingaw ni sa mga tawo.  Pero gigamit na kini sa uban para sa dili maayong tumong.

Gawas sa mga independenteng magsige og post og mga binuang ug dili maayong mga pagtulon-an, gigamit sab kini sa mga dautang mga politiko para makabentaha sa ilang mga kontra ug ilaron sa ilang propaganda ang mga botante.

Nahimo sad kining kahimanan para mga panatikong supporters sa mga politiko nga bisan sayup, ilaha gyung ipamugos nga maoy sakto kay gikan sa ilang idolo—dili kini maayong impluwensiya para sa mga kabataang Pilipino.

Ang Meta maoy tagiya sa Facebook. Kung dili sila motabang pag-kontrol aning mga binuang diha sa ilang platform, puydeng ang gobiyerno na maoy mobuhat og paagi pag-block ani.

Apan kung ang makuhang benepisyo gikan aning Facebook dinhi gamay ra kaayo kun itandi sa resulta nga kaalautan, pagkaguba, ug pagkawagtang sa moralidad sa mga Pilipino ug sa tibuok nasud, mas maayo pang wagtangon kini sa hingpit.

Kay kung buot hunahunaon, ang freedom of speech nga gigarantiya sa Konstitusyon, wala man mag-ingon nga pinaagi lang sa Facebook o social media.

Hunahunaa kuno, ini’g mata ugma wala nay social media, dili ba matunhay ang trabaho sa tanan.

Pero, subo lang kaayo nga naglabi pud ang pagkatap og mga dili maayong mga contents, bastos, bayolente, fake news, pagpanaot sa uban, pagbutang sa peligro sa nasudnong seguridad, ug daghan pa nga dili maayong impluwensiya sa kabataan.