Kakak sa mga Duterte
Sa kadaghan sa mga pasangil ni Ramil Madriaga batok niya, si Bise Presidente Sara Duterte nipili sa pagtubag sa walay kapuslanan nga detalye nga naglisod siya sa college of law. Nganong wala man mokurihir sa mga pangangkon sa confidential funds? Tingali nabalaka nga maapektahan ang iyang depensa sa impeachment trial, kon madayon.
O tingali kay nahagbong si Madriaga sa bar exam. Nakakita og mas sayon nga paagi sa pagpakauwaw. Kay ang mga Duterte dili motuki sa lehitimong mga isyu. Kon dili sa mga anggulo lang nga makabentaha ug makapanginsulto sila.
* * *
Sama pananglit sa kontrobersiyal nga demolisyon sa 2011 dihang siya pay mayor sa Davao City. Mahimo untang awhagon ang korte paglangay sa pagguba sa kabalayan. O kon gusto gyong mopasakit, nganong dili man ang tag-iya sa yuta ang gikuwelyohan?
Kay ang huwes mahimong mobasura sa iyang mosyon. Kay ang tag-iya sa yuta dunay kuwarta ug abogado nga makasukol niya. Walay dag-anan niya ang court sheriff. Ubos ra kaayo og puwesto aron mangahas sa pagpa-disbar niya. Kay ang mga Duterte manghasi lang sa ilang gituohan nga dili makasukol nila.
* * *
Sa kadaghan sa mga gipanulti ni Madriaga atubangan sa House Justice Committee, si Davao City Mayor Baste Duterte nipili pagtubag sa walay kapuslanang detalye nga ginganlan og bading sa iyang kaugalingong amahan.
Imbes motarung og pasabot nga pataka rang istorya ni kanhi Presidente Rodrigo Duterte, gihagit ni Baste si Madriaga og sinumbagay. Kay ang mga Duterte bentahuso. Kumbinsido si Baste nga nakabentaha kay gamay ug hamtong si Madriaga. Nihilak pa gyod atubangan sa mga kongresista.
* * *
Maproblema si Baste kay gisakyan ni Madriaga ang binuang. Gidawat ang hagit ug nisugyot nga adto sa iyang prisohan sila mag-engkuwentro. Mahimong mangisog gihapon si Baste kay nahibawo nga dili tugotan sa Bureau of Jail Management and Penology (BJMP) ang away.
Pero kon dunay makatambag ni Madriaga (labi na kon mosakay sa kontrobersiya si Heneral Nicolas Torre) sa pagkumbinser sa BJMP sa paggamit sa okasyon para sa mas dakong kawsa, sama sa pagpangolekta og donasyon sa pagpalambo sa mga prisohan sa nasud, mapugos na sab si Baste sa pag-imbento og rason sa dinalian nga pagbiyahe sa Singapore.
- Latest
