EDITORYAL — Leksyon sa Ban-Tal Discipline Zone

Daghan ang nadismaya nga mga motorista niadtong unang gipatuman ang Banilad-Talamban Discipline Zone sayo ning bulana. Gani sa unang adlaw palang, 80 ka mga citation tickets ang naisyu batok sa mga pedestrians ug motoristang nakalapas sa mga lagda sa trapiko.

Dili gani to kalit-kalit nga gipatuman tungod kay taas-taas ang panahon nga gisigehan kini og anunsyo sa Cebu City Traffic Office para mahibaw-an sa tanang motorista ug sa publiko sa kinatibuk-an. Apan bisan pa ana, daghan gihapon ang nangadakpan. Pero dili tanang nakalapas gibuhat to nila kay wala tuyoa, kondili mao na gyuy naandan sa mga tawo ug sa mga motorista, maong daghan ang nadakpan.

Apil ana ang pataka og hunong aron magpakanaog ug magpasakay og mga pasahero nga mga pasaheroan, ang mga pasahero pud, pataka ra sad og para mao nga matintal pud ang mga drayber paghunong aron sila pasakyon o pakanaugon.

Ang pagdili sa mga motorsiklo nga makasaka sa Banilad flyover niresulta pud sa paghuot sa traffic sa mga gamay nga alternatibong mga dalan duol sa Ban-Tal o Gov. M Cuenco Avenue.

Partikular na ang dalan padung sa Barangay Apas ug ang pribadong access sa atubangan sa us aka dakong mall kay didto tanan gahuot ang mga motorsiklong wala paagia sa flyover.

Maayo nalang kay pagkasunod adlaw, giusab sa CCTO ang sistema, gipabalik og agi ang mga motorsiklo diha sa flyover samtang gipadayun ang estriktong pagpasunod sa motorcycle lane ug road sharing, hugot nga pagtuman sa loading ug unloading area ug anti-jaywalking.

Pero, halos tanang nangadakpan sa unang adlaw maoy luoy kay gikinahanglan man silang pamultahon.

Ning bag-o, si Konsehal Kendrick Go niduso og resolusyon para hangyuon si Cebu City Mayor Nestor Archival nga pasayloon nalang ug dili na pamultahon ang mga nadakpan anang adlawa. Kasagaran nila nakalitan gyud.

Total naleksyon naman ang mga motorista ug mga pedestrians diha , dili man siguro ika-alkanse sa siyudad kung pasayloon nalang ang mga nangadakpan.

Pero ang tinguha nga mapamenusan ang traffic sa maong lima a kilometrong dalan gikan sa Banilad padung sa Talamban, nisamot man hinuon tungod sa kagrabe ka estrikto wala nay sakyanan ug mga motorsiklo nga makalusot-lusot.