Pinili nga pagpapanubag

Gipasanginlan ni kanhi Kongresista Mike Defensor si Presidente Ferdinand  "Bongbong" Marcos nga nagdawatan og tag P100 bilyones gikan sa mga flood control project gikan sa mga tuig 2023-2026. Ang pasangil ni Mike Defensor iyang gibasi sa mga pahayag ni kanhi House Appropriations Committee chair, kongresista Zaldy Co.

Ang pahayag ni Co ug Mike Defensor gipamatudan sa mga security personnel ni Co kinsa mao mismo ang mihatod sa mga maleta nga adunay sulod nga minilyon nga salapi sa  balay ni Presidente Marcos Jr., kanhi House Speaker Martin Romualdez,  mga opisyal sa Department of Public Works and Highways ug uban pang opisyal sa gobyerno ning kasamtangang administrasyon.

Bisan pa sa mga ebidensiya nga gipanumpaan sa mga testigo nga adunay deriktang kasayoran sa panapi sa Presidente ug iyang mga kauban gipiyongan lamang kini sa mga nag-imbestigar. May nakit-an man tuod ang mga imbestigador apan kadto lamang mga mayokmok. May gipasakaan man tood og kaso sa mga nalambigit sa flood control project apan kadto lamang mga guno kun naisda pa ug dili ang mga hyena. Ang mga alipores ni Presidente Marcos Jr. dali ra kaayo nga nakabasura sa impeachment complaint nga gisang-at batok niini samtang ilang gipasutoy ang impeachment batok ni Bise Presidente Sara Duterte.

Kun may nakita man nga kaso sa pagpanapi ang mga kongresista nga gihimo ni VP Sara, wala sila makakita sa bantang kaayo nga panapi ni Presidente Bongbong Marcos Jr. sa pundo sa flood control? Hinuon dili gyod makakita ang mga kongresista sa panapi sa Presidente kun atong tuohan si Zaldy Co ug Mike Defensor kay kadaghanan sa mga kongresista nga nag imbestigar apil man sa nskadawat og maleta nga may sulod nga minilyon nga salapi ug kun wala apil sila sa mga kontraktor sa flood control project nga substandard, non existing ug ghost.

Maong pinili ug gipili lang nila ang papanubagon sa panapi sa flood control project.