Bawal ang full tank

Naglaraw si Bicol Saro Party-list Representative Terry Ridon nga did-an ang mga motorista sa pagpatubil sa ilang mga sakyanan og full tank isip alternatibo sa extreme measure sa mandatory rationing.

Matud sa kongresista nga mamahimong ipatuman sa gobiyerno ang limitasyon sa matag palit sa motorista og produktong petrolyo nga ibase sa sinemanang konsumo sa matag motorista aron malikayan ang hoarding.

Ang pasiunang himoon, matud pa ni Kongresista Ridon mao ang pagbotang og limitasyon sa matag motorista nga mopalit og lana. Pananglit, kun motorista wala magkinahanglan og full tank sa iyang sakyanan sa usa ka semana, kinahanglan nga katunga lang sa iya nga tangke ang itubil nga lana sa iyang sakyanan.

Kun ang tumong ug tuyo ni Kongresista Terry Ridon mao aron malikayan ang hoarding, nganong ang mga mitorista man ang iyang pontaryahon.

Nga kun ibotang nato nga maghoarding og lana ang mga motorista pila ra man ka litro ang ilang ma-hoard. Dili man pod ni sila puwede nga magpundo og lana sa ila balay kay basin og makamugna og sunog.

Sinemana ang umento sa lana, dili ba angayan gani unta nga dasigon ni Ridon ang mga motorista nga magpa full tank aron makadaginot sila kay segurado nga sa sunod nilang patubil misulbong napod ang presyo sa lana?

Kang kinsa man nga interest ang gipanalipdan ni Ridon, ang sa katawhan o ang sa mga negosyante og lana?

Wala marehistro sa utok sa kongresista nga kun maghisgot og hoarding ang mga kompanya sa lana ang naghimo niini? Nakadungog na ba mo nga nanago og lana ang mga motorista?

Mura man og balitok og utok ni si Kongresista Terry Ridon.

Dasigon unta nimo Kongresman Ridon ang mga motorista nga magpa full tank karon ug magdaginot sa lana sa iyang sakyanan aron sa sunod semana nga umento sa prisyo sa lana dili siya makapatubil kay naka full tank siya, at least ang motorista nakaginhawa og usa ka semana sa pagtaas sa prisyo sa produktong petrolyo.