Editoryal — Kalkuladong relasyon

Sa pagbiyahe ni Presidente Ferdinand Marcos Jr. didto sa nasud sa Russia alang sa opisyal nga pagbisita isip chairman karong tuiga sa ASEAN, naay mga nakitang mga oportunidad nga parehong mabulahan ang duha ka mga nasud.

Nagkita sila ni Russian President Vladimir Putin kinsa makita sa mga hulagway ug mga videos ang dakong kalipay ilang presidene sa paghimamat nilang duha. Ikaduha na kining higayon sukad nahimong presidente sa Russia si Putin nga nakahimamat ang mga lider sa Pilipinas diha mismo sa ilang nasud.

Una si kanhi presidente Rodrigo Duterte ug karon si Marcos. Sukwahi sa nakalabay nga administrasyong Duterte nga dayag kaayo nga gustong makigsuod sa Russia ug “idol” pa gani niya si Putin, si Marcos nirepresentar sa Pilipinas ug sa ASEAN didto para sa pagpalig-on sa diplomatikong relasyon sa rehiyon.

Ang Pilipinas ug Russia nagsaulog bag-ohay lang sa ika-50 anibersaryo sa diplomatikong relasyon sa duh aka nasud.

Panagsa ra ni nga kahigayonan para sa Pilipinas nga naila nga pro-west unya naa pa gyud karoy tension didto sa Ukraine. Ang Pilipinas usa sa nikondenar sa Russia pagatake ni sa Ukraine.

Apan bisan pa niini, matinahurong gidawat ni Putin si Marcos ug dunay mga nakab-ot nga mga kasabutang makabenepisyo pareho ang duha ka mga nasud sa natad sa turismo, enerhiya ug sa agrikultura.

Wala sila maghisgot og mga butang o isyu nga makapaaslom sa panagtiguom sama sa gubat sa Ukraine. Nagpakita sab og maayong pamatasan si Putin kang Marcos, pinaagi sa pagsanong sa hangyo nga papaulion dinhi sa Pilipinas ang 24 ka mga Pilipinong gi-detiner sa mga prisohan didto.

Wala ra abti og 24 oras gimando ni Putin ang pagpapauli sa maong mga Pilipino ug karon nabalik na sa ilang mga pamilya dinhi.

Angkunon man sa Pilipinas ug dili, dako og matabang ang Russia para sa kalamboan sa nasud , particular ang sa enerhiya tungod kay ang Russia mao ang numero unong oil producer sa kalibotan.

Kinahanglan lang nga kalkulado sa gobiyerno ang pakiglambigit niini sa maong nasud tungod kay manag-alyado ang Russia ug China. Ang China ug Pilipinas dunay bikil sa West Philippine Sea.