Padayon ang pagsaka sa presyo

Base sa Mean of Platts Singapore trading sa milabay’ng upat ka adlaw, usa ka tinubdan sa oil industry namahayag nga mahimong mosaka pa ang presyo sa krudo ug gasolina sa sunod semana diin mokabat na sa tag-P165 ngadto sa tag-170 ang litro sa diesel ug P110 ngadto sa P120 ang litro sa gasolina.  Taas na kaayo ang pagsaka sa presyo sa krudo ug gasolina sukad sa pag-ulbo sa gubat sa Middle East ug wala pa kita’y naaninag nga paghupa ni’ng maong krisis.  Matud pa sa akong amigo, “Tungod sa kamahal sa gasolina, mas daghan pa ang higayon nga taas ang gauge sa temperature sa akong sakyanan kon itandi sa gauge sa gasolina.”  Fezteleern!

Matinuod ang fake news

Dali’ng gisalindot sa Malacañang nga “fake news” ang usa ka advisory nga nagpasidaan nga adunay energy lockdown sugod karong Abril 20, 2026.  Migamit sa logo sa Department of Energy ang maong advisory ug miawhag sa publiko pagpangandam sa mga kinahanglanon alang kunohay sa maong lockdown.  Daghan gihapon ang nabalaka sa maong “fake news” nga miresulta sa pag-panic buying.  Komento pa sa akong silingan, “Basin baya mas “fake news” pa ang pasidaan sa Malacañang kay wala ma’y klarong solusyon ang gobyerno sa giatubang nato’ng krisis busa may purohan nga mahitabo ang energy lockdown.”  Madahaan!

Walay abilidad

Adunay giingon nga politikanhon panagbangi tali kang Cebu City Mayor Nestor Archival ug Bise Mayor Tomas Osmeña kabahin sa kasamtangan’g City Administrator. Gihinganlan ni Osmeña ang administrador nga “bangâ” kon incompetent apan gilabanan dayon kini ni Archival ug padayon gihapon ang iyang suporta sa iyang tinudlo luyo sa maong pagsaway.  Kon kinsa man ang husto tali sa duruha, panahon ra ang magatug-an.  Kay ginaingon man nga, “Mokagar ang pagdumala sa kagamhanan kon ang abilidaran walay awtoridad ug ang may awtoridad walay abilidad.”   Muleeng!

Dili kay applause lamang

Dili lang ang mga PUV drivers ug commuters ang apektado sa nagsaka nga presyo sa krudo, kon dili lakip na usab ang nangibuhi isip fire dancers didto sa Puerto Galera, Mindoro.  Apektado  usab sila kay krudo man ang ilang gamiton sa ilang pagsayaw kay dugay man kini mapalong.  Tambag sa akong amigo ngadto sa mga fire dancers, “Inay palakpak (applause) lang ang inyong pangayoon sa audience, paamota na lang hinoon sila’g kwarta aron ipalit og dugang krudo.”  Ateerr!

Makalibog ang gobyerno

Gisakmit sa kapolisan ang dilli momenos P50 milyones nga kantidad sa mga smuggled nga sigarilyo gikan sa Indonesia didto sa lungsod sa Datu Sinsuat, Maguindanao del Norte. Namaktidan ang smuggling operation kay lantaran man ang pagkamada sa kinarton nga imported nga sigarilyo.  Makapaduda na kining kaisog ug kabulgar sa mga smuggler sa ilang operasyon.  Hayan adunay nagpaluyo ug nanalipod kanila nga mga opisyales sa gobiyerno.  Makapahinumdum sa tawo’ng nadakpan kay ilegal nga nagprinta og kwarta. Matud pa niya, “Makalibog ang gobiyerno.  Ingon wala kini kwarta, unya ato tabangan himô og kwarta, dakopon man hinoon ‘ta.” Pagkatoytoy!