Manguros lang kon mo-kilat

Namahayag si Presidente Marcos, Jr., nga padayon’g nangita ang kagamhanan og mga pamaagi aron mahatagan og subisdiya ug ayuda ang katawhan samtang nakigbisog kini sa epekto sa pagsaka sa presyo sa gasolina. Giangkon sa presidente nga dakong hagit sa policy planning ang nag-usab-usab nga presyo niini.  Samtang sa ubang nasud nahikyad ug napatuman dayon ang mga polisiya ug gimbuhaton aron matabangan ang ilang katawhan, dinhi sa ato, nagsige pa’g plano kon unsay buhaton. Mao kana’y giingon sa mga katiguwangan nga, “Diha pa kita manguros kon ma-igo na sa kilat.” Fezteleern!

Wala unta’y pili-on

Gikwestyon sa MANIBELA, usa ka PUJ transport group, ang paghikling kanila isip benepisyaryo sa ayuda sa kagamhanan. Nasayran nga giuna paghatag sa P5,000 nga fuel assistance sa gobiyerno ang mga tricycle drivers.  Alang sa MANIBELA, dili kini maki-angayon kay parehas man usab sila nga nagping-it sa nagsaka’ng presyo sa gasolina.  Makapahinumdum sa lola nga mikasaba sa iyang mga apo’ng babaye tungod sa paghangyo nila sa mga tulisan nga dili na lang unta apilon paglugos ang ilang lola.  Misulinga ang lola pag-ingon nga, “Ayaw mo pagbuot. Kon moingon ang tulisan nga tanan lugoson, aaw, tanan.”  Madahaan!

Wala na’y pulos

Gikataho nga usa ka tricycle driver ang namatay sa hospital ug wala makadawat sa iyang cash assistance gikan sa gobyerno human gibalibaran ang anak sa driver sa pag-claim sa ayuda bisan kon aduna kini dala’ng authorization gikan sa amahan.  Kakulang sa sentido komon ingon man ka-lubog sa sistema sa pagpanghatag ang makitang hinungdan ni’ng maong trahedya.  Mosamot kagubot ang ayuda kon sagolan pa gyud og pamolitika.  Haum ang panultihon nga, “Unsaon pa man ang kumpay kon patay na ang kabayo?”  Muleeng!

Tungod sa baho

Usa ka dakong koalisyon sa mga opisyales sa gobiyerno, mga environmental advocates ug industry stakeholders ang milagda og “pledge of commitment” nga nagtimaan sa usa ka konkretong lakang paingon sa usa ka hini-usang aksyon sa pag-atiman sa krisis sa basura. Dili kaha maayo nga inay magpinirmahay, buhaton na lang ang gilatid sa R.A. 9003 kon unsaon pagdumala ang atong basura.  Mao ra’y nakalaay ani kay mas mahinungdanon pa ang announcement kay sa action.  Nanimahong pasundayag ra kining gibuhat sa mga opisyales. Mao kana’y giingon sa panultihon nga, “Masakpan ang pugante sa prisohan tungod ra sad sa iyang bahô.”  Atala lagee!

Mosukol sa asawa

Base sa datos sa Cebu Provincial Police Office (CPPO) adunay 47% nga pagkunhod sa natala’ng kaso nga violence against women and children (VAWC) nga naobserbahan sa probinsiya sa Sugbo sa unang quarter sa tuig gumikan sa hugtanong kampanya ubos sa ilang “Pulis sa Panimalay” program.  Maanindot kining maong kalambuan kay nagpasabot man kini nga adunay kalinaw ug kahapsay sa matag banay.  Apan sa habig sa akong kumpare, namahayag siya nga bisan wala pa’y programa ang kapolisan, malinawon ra kanunay ang ilang panimalay. Kay matud pa niya, “Kon awayon ug dagmalan na gani ko sa akong asawa, mosukol man ko.”  Pagkatoytoy!