Abusado

Si Dumanjug Mayor Gungun Gica, miingon nga sila kunong mag-drive og big bike mo-overtake gyud sa ubang mga sakyanan kay kon hinay ang ilang pagpadagan, hapdos kuno kaayo sa ilang “legs” kay init ang makina sa big bikes.

Ambot og unsa kaha ang inyong ikasulti sa pamahayag sa mayor. Nadasmagan ni Gica ang usa ka van didto sa national highway sa Barangay Pakigne, Minglanilla kaniadtong Domingo kay pwerte niyang kusoga nga nagpadagan sa iyang motor, ug mi-counterflow, didto agi sa pikas lane.

Para nako, sayop gyud kaayo ang iyang gihimo, ilabi na nga sakop siya sa Tiger’s Group sa PNP Highway Patrol nga nag-adbokasiya og maayong pagmaneho og sakyanan diha sa atong mga karsada.

Unya, wa pa’y plate number ang iyang motorsiklo kay bag-o kuno, ug wa pa mahatag. Buyno, pwede man unta siya makapahimo og improvised plate, unya itaod gyud sa motor nga dili matangtang pagdali, samtang iyang paabuton nga mahatag na kaniya ang plaka gikan sa LTO.

Kon ang iyang rason nga tungod kay big bike ang iyang gimaneho, ug batasan kuno nilang mga driver og big bikes nga mo-overtake gyud kay paspas ang ilang pagpadagan, angay gyud siya’ng dili na tugotan nga maka-drive.

Maayo gani kay wa tawo’y kinabuhi nga nakalas sa maong hitabo. Kon pananglit, dunay tiguwang nga milabang ug iyang madam-agan, igo lang ba siya nga mangayo’g pasaylo, unya kay kuwartahan man siya, bayran ang kinabuhi sa biktima ngadto sa pamilya?

Estrikto kaayo kini si Gica, gani diha pa may higayon nga gisaway siya kay nanagmal og tawo nga nakahimo sab og krimen. Suporta ko ni Gica niadto kay duna siya’y kaisog.

Apan ang pag-abuso niya pinaagi sa pag-counterflow, pag-overspeeding sa peligro nga dapit sa national highway, salawayon gyud kaayo, ilabi na nga siya sakop sa Tiger’s Group.

Dunay posibilidad nga kon may madam-agan si Gica, unya dili ra siya matumba, o kaha makapadagan pa dayon pagbalik, wa gyuy makaila kon iyang sibatan kay nagka-full-faced helmet ug way plate number ang motor.

Pagka karon, gipahibawo ni LTO-7 regional director Wendell Dinglasan nga suspendido og 90 ka adlaw ang lisensiya ni Gica, samtang gipadayon ang imbestigasyon sa LTO.

Ang mga tawo maniid kon unsay himoon ni Director Dinglasan niining pag-abuso ni Gica. Unta, makakat-on og leksiyon si Mayor Gica nga dili gyud maayo nga moabuso sa balaod.

Kon magtan-aw ka sa dash cam video, dili ka gyud makakatawa nga magtan-aw, ug tingali sama kanako, makapanglingo-lingo ka gyud kay klaro kaayo ang pag-abuso.

Makita sa video nga dili traffic didto sa lane nga angay’ng agian unta ni Gica, apan gituyo gyud niya nga didto siya sa pikas moagi, nga maisip nga usa ka paghinambugero ug pag-abusar.