Anaa sa sayop nga trabaho

Gikompirmar na sa Malacañang ang pagtaktak ni Cristina Frasco isip kalihim sa Department of Tourism (DOT).  Hinuon, dili siya hingpit mawala sa Marcos administration kay himoon man siyang Presidential Adviser for Sustainable Development.  Daghan ang mga pagsaway nga naani ni Frasco isip kalihim sa DOT tungod sa giingon kamahiligon niya sa self-promotion ug ingon man sa kulelat nga tourist arrivals sa atong nasud kon itandi sa ubang nasud sa Southeast Asia.  Haum kaniya ang panahom nga, “Ang pagkataktak mo sa trabaho maoy paagi sa kinaiyahan pagpadayag kanimo nga anaa ka sa sayop nga trabaho.” Muleeng!

Pag-unong batok pagluib

Namahayag si Davao City Rep. Paolo Duterte nga ang pagtugyan ni kanhi pangulo Rodrigo Duterte ngadto sa ICC usa ka ehemplo sa pagkamaunongon (loyalty) nga gibawsan hinoon og pagluib.  Gitubag gilayon kini ni Palace Press Officer Claire Castro pag-ingon nga ang utang-kabubot-on dili igo’ng hinungdan nga isalikway lang usab ang mga biktima sa EJK.   Tinuod gayod nga ang kaugalingon’g interest maoy modeterminar sa pagka-maunongon o pagkamaluibon.  Mao kana’y giingong nga, “Ang labing subo palandongon mao nga ang pagluib dili mag-gikan sa imong kaaway; maggikan kini sa mga tawo nga imong gisaligan sa hingpit.”  Fezteleern!

“Justice by installment”

Matud pa ni Ombudsman Jesus Crispin Remulla, girekomendar sa Independent Commission for Infrastructure (ICI) ang pagpasaka og kasong kriminal batok sa walo ka kongresista nga nahilambigit sa anomalosong flood control projects.  Wala pa hinoon ipadayag ni Remulla ang mga pangalan sa walo ka kongresista.  Gitagi-tagi pa gyud sa Ombudsman ang kasayuran nga daw aduna siya’y giprotektahan o ba kaha gihatagan pa niya’g kahigayonan nga makamang ang ilang kaso?  Nakasaway ang akong amigo’ng abogado ni’ng pagtagi-tagi sa Ombundsman. Matud niya, “Dinhi ra sa Pilipinas nga adunay maingon nato nga ‘Justice by installment’.”  Hala noo!

Dugangi’g tawo

Nakigkumboya ang DPWH sa Department of Trasportation (DOTr) aron mapatuman ang gitawag nga “walkable infrastructure” diha sa EDSA taliwala sa mga paningkamot sa pagdaginot sa gasolina.    Ang pagpalapad sa mga sidewalks ug pagbutang og mga bike lanes sa atong kadalanan usa ka proyekto nga angay na unta gipatuman, ma-krisis man o wala.  Apan kining pagkumboya sa duha ka ahensya, gipanglantawan nga makalangan hinoon pagpatuman sa proyekto.  Kay matud pa bitaw nga, “Kon buot ka nga mas malangay pa gyud ang proyekto, dugangi pa’g daghan tawo nga motrabaho niini.”  Madahaan!

Wala mananghid

Naalarma ang mga pasahero nga nagbiyahi-an sa Cebu City ngadto sa Lapu-lapu City tungod sa kalit nga pagsaka sa ilang plitehan og balor P10 pesos sa van-for-hire bisan walay pa’y opisyal nga pagtugot sa LTFRB.  Hilabihan na ang pagsaka sa presyo sa gasolina ug nagping-it na pag-ayo ang mga driver. Langay usab kaayo gobiyerno pagpatuman og mga interbensyon aron matabangan ang mga drivers og commuters. May punto ang justification sa usa ka driver nga miingon, “Ngano’ng mananghid pa man mi nga wa man gani pud mananghid ang gasolinahan nga mopasaka sila sa presyo sa ilang gasolina.”  Pagkatoytoy!