Active Shooting Drill gikinahanglan na

Dili na gyud kakompyansahan ang panahon karon. Ang mga mangilngig nga trahedya nga kaniadto sa mga balita sa gawas sa nasud lamang nato makit-an, ania na sa atong mismong tugkaran. Human sa nahitabong mass shooting didto sa Tacloban City—nga gihulagway sa Department of the Interior and Local Government (DILG) nga labing unang insidente sa nasod nga nakakalas og tulo ka kinabuhi—klaro ang mensahe: panahon na para sa dinalian ug seryosong lakang.

Kong aduna kitay regular nga fire ug earthquake drills, mas maayo seguro nga i-apil na usab ang usa ka active shooting simulation sa mga tunghaan. Mao kini ang haom nga sugyot ni Police Col. Elmer Cinco sa Regional Civil Security Unit (RCSU-7) atol sa usa ka press conference sa Police Regional Office (PRO-7).

Angayan nga suportahan ug madayon kini pinaagi sa pagtinabangay sa Department of Education (DepEd), lokal nga kagamhanan, ug uban pang ahensya. Dili kini angayng ipakamay ra, kay kinabuhi ug kaluwasan sa mga tinon-an ang nakataya niini.

Gawas sa drills, kinahanglang sumpoon ang usa sa mga gamot sa problema: ang bullying. Kasagaran sa mga kasamok sa eskwelahan nagsugod sa pagpangdaog-daog nga kong pasagdan, mahimong dako nga dula sa kapintasan. Dalaygon ang pamaagi sa Bulacao Community School sa Dakbayan sa Sugbo diin ang ilang prinsipal hugot nga nagpahinumdom batok sa bullying kada human sa flag raising ceremony.

Mas epektibo pa gyud kong ang matag magtutudlo mopahigayon og mubo nga pahimangno matag buntag ug hapon sa dili pa mosugod ang klase. Kong walay dinalian nga follow-up, ang biktima sa bullying magluom lang, magdumot, ug basin makahuna-huna og dautan isip panimalos.

Aron masiguro ang hingpit nga seguridad, gikinahanglan usab ang inspeksiyon sa mga kagamitan. Bahala og malangan og kadiyot ang klase, basta maseguro nga walay dalang hinagiban ang mga bata pinaagi sa paggamit og metal detectors o manual nga pagsusi sa bag. Sa Bulacao, pananglitan, aduna nay nasakmit ang mga guwardiya nga batsikorno (brass knuckles). Bisan pa og rason sa bata nga pang-proteksyon lang kini, isipon gihapon kini nga dehadong hinagiban nga hugot nga gidili sulod sa eskwelahan.

Ang seguridad sa mga anak dili lang abaga sa tunghaan. Kinahanglang magsugod kini sa panimalay pa lang-diin ang mga ginikanan maoy unang mosusi sa mga bag ug mag-gabay sa saktong pamatasan sa ilang mga anak.Diling lang kini tahas sa DepEd o sa kapulisan; kini usa ka hiniusang paningkamot sa tibuok komunidad. Dili na nato huwaton nga duna pay laing kinabuhi nga makalas una kita momata sa kamatuoran.