EDITORYAL - Proteksyon sa kababayen-an

Gitimaan karong adlawa sa Pilipinas ang National Women’s Month aron paghatag og importansiya sa ilang dakong papel sa katilingban lakip na usab ang paghatag kanila og proteksyon batok sa mga pagpangabuso. Dinhi sa Sugbu, nagkalain-laing mga kalihokan ang gihimo sa mga local government units, naay mga nagdayandayan og suga nga kolor ube o purple para sa pagpakita sa ilang suporta ngadto sa mga kababayen-an.

Didto sa Mindanao, haom kaayo ang gipagawas nga “Fatwa” o religious edict sa Islamic jurist sa Bangsamoro Autonomous Region in Muslim Mindanao (BARMM) nga usa ka “haram” o dili mahimong dawaton nga ang babayeng biktima og pagpanglugos ipakasal sa tawong nilugos kaniya.

Subo paminawon apan daghang mga susama ani nga mga hitabo dinhi sa Pilipinas ilabi na sa mga hilit o lagyong mga probinsya. Gibuhat ug gidawat kini sa uban para lang “pagsalbar sa dungog” sa babayeng biktima.

Apan ang pagkatinuod, ang pamilya sa mga rapist maoy kusog mamugos ani aron luwason ang ilang kadugo nga nakasala. Kauban ani ang pagpanuhol pinaagi sa pagbayad ug paghatag og mga umahan, hayopan, kwarta ug bisan mga armas aron lang mosugot ang pamilya sa babaye.

Ang biktima gilawog naman hinuon sa tawong miabusar ug wala morespeto sa iyang pagka-babaye. Mura og gitiwasan ang biktima ug paantuson samtang nakig-uban sa tawong nidaug-daog sa iyang kahuyang.

Ug sa Ubos Balay Balauranan, nag-atubang karon og reklamo sa Ethics Committee si Quezon City Rep. Bong Suntay tungod sa gihulagway nga sexist ug macho niya nga pamahayag nga gigamit ang pangalan sa aktres nga si Anne Curtis.

Daghan ang wala makauyon sa iyang pamahayag ilabi na sa mga babayeng mga magbabalaod nga kauban niya atol sa hearing sa impeachment complaints batok kang Vice President Sara Duterte sa Committee on Justice.

Nasayran sab nga konsehal pa kaniadto sa siyudad sa Quezon si Suntay sa dihang gipasar sa konseho ang “Bawal Bastos Ordinance.”

Sa bag-ong panahon karon, gikinahanglan na ang patas nga pagtagad sa kababayen-an  sa katilingban. Duna silay katungod sa mga oportunidad, manalipod sa kaugalingon ug labaw sa tanan proteksyon sa balaod.