Di gyud mag-away

Nindot ang kalamboan nga nahilot na ang panagsungi nila ni Cebu City Mayor Nestor Archival ug Mabolo Barangay Captain Daniel Francis Arguedo kabahin sa paghimo sa Block 27 diha sa North Reclamation Area nga transfer station sa mga basura. Anha diha sa mao nga dapit bahigbahigon ang mga basura aron buwagon ang mga basura nga malata, ug kadtong dili malata.

Mao unta kini ang usa sa akong target nga himoan og kasulbaran kon nahatagan pa ko dayon og higayon. Dili gyud maayo nga mag-away ang mga opisyal sa kagamhanan, sama kanila ni Mayor Archival ug Kapitan Arguedo. Pulos sila mga pangulo sa lainlaing local government units (LGU), ug ang kinahanglang himoon mao ang pagsinabtanay.

* * *

Bag-o pa gani kaayo nga ang mga senior citizens dinhi sa Cebu City gipanghatagan og tag P2,000 nga financial assistance para sa Enero ug Pebrero, apan karon nakabasa ko og uploaded post sa social media gikan sa usa ka senior citizen nga nangutana na pud kon kanus-a ang sunod nga pagpanghatag sa cash assistance.

Maghuwat lang uy, kay mohatag man gyud ang Cebu City government sa cash assistance. Kon magsige og pangutana kanus-a ihatag, makaingon ang uban nga makaluluoy na gyud kaayo ta niana.

* * *

Driver ka gani, kinahanglang nahibawo ka gyud sa power sa brake sa imong sakyanan kon unsa kalayo kini nga mohunong kun gusto na nimong pahunongon, ilabi na og "emergency stop." Ikaduha, kon hinay ra ang dagan, mahimo nga sundon nimo ang lagda nga bali'g usa ka sakyanan nga distansya (one vehicle apart) apan lahi na kini kon kusog ang imong dagan ug ilabi na kon danglog ang karsada.

Mao kini ang nahitabo didto sa Ormoc City nga nadam-agan sa trak ang motorsiklo nga gisakyan sa usa ka maestra, ug nakalas gyud ang kinabuhi sa biktima. Ang motor nga gisakyan sa maestra nag-una sa usa ka trak, ug pareho ang ilang direksyon. Pag-abot sa Pedestrian Crossing dunay mga tawo nga molabang sa pedestrian lane. Isip maayong driver, mo-giveway ka gyud sa mga pedestrian, gawas kon dunay traffic lights nga nagdili pa kanila s paglabang.

Naghinong na ang motorsiklo nga gisakyan sa maestra, apan ang driver sa trak wa makapugong sa iyang sakyanan ug gidam-agan tawon ang motor. Resulta, nakalas ang kinabuhi sa maestra. Tingali kining driver nga si Eleser Perales, apil sa giingon nga "kamote drivers" nga way naantigohan sa tukmang lagda pagmaneho og sakyanan.

Dili na maayong hatagan og lisensiya kining maong driver, aron mangita na lang siya og laing trabaho. Kamong ubang driver, hinuktoki ninyo ug pagtuon sa tukmang lagda sa pag-drive.