Bulala

Personal ko’ng mituo nga lahap ra ang pagtaral kang kanhi presidente Rodrigo Duterte didto sa International Criminal Court (ICC) tungod sa mga nahitabong patay sa mga gidudahang durugista dinhi sa nasud atol sa iyang kampanya batok sa illegal nga drugas.

Gawas nga dili na sakop ang Pilipinas sa Rome Statute, wala manirado ang mga hukmanan sa Pilipinas aron modangop ang mga biktima sa ICC pagpangayo og hustisya.

Buhi ug pabiling epektibo ang sistema sa hustisya sa Pilipinas nga mahimong kadangpan sa mga nangangkong biktima sa anti-drug campaign ni Duterte.

Ug pruweba niini ang kaso sa batan-ong si Kian de los Santos kinsa giingong gipatay sa kapolisan didto sa Caloocan niadtong 2017 human gidudahang nalambigit sa drugas. Ang mga hukmanan sa Pilipinas gikan sa Regional Trial Court hangtod sa Korte Suprema mihukom nga sad-an ang mga polis nga nalambigit ug gisilotan nga mabilango hangtod sa 40 ka tuig o reclusion perpetua tungod sa kasong murder.

Ang mga polis nga gikonbikto sa hukmanan naglakip nilang Police Office Arnel Oares, Jeremias Pereda, ug Jerwin Cruz. Kini pagmatuod nga pabiling naglihok ang sistema sa hustisya sa Pilipinas ug way rason nga adto sa ICC itaral ang kanhi presidente.

Kun alang sa pamilya sa mga napatay nga durugista atol sa anti-drug war ni Duterte dunay nahimong kalapasan ang kanhi presidente, nganong wa man nila kini ikiha dinhi sa Pilipinas? Kun may kasong nahimo ang kanhi presidente angayang dinhi siya manubag sulod sa atong nasud.

Apan samtang niuyon ko sa sentimento sa mga dumadapig ni Duterte, dili sab husto ang pamasangil sa iyang abogado nga si Nicholas Kaufman ngadto sa mga sakop sa media atol confirmation of charges hearing.

Si Kaufman mitumbok sa media nga maoy nagpadako sa isyu ug nagpagamit sa mga grupo nga dunay personal nga mga interest. Ang media mensahero lang ug dili maoy nagkontrolar sa lihok ug mga gipanulti sa kanhi presidente.

Ang tinuod nga hinungdan sa problema nga giatubang ni Duterte mao ang iyang pagkabulala og baba. Kun dili pa siya magpunay og panghulga sa mataghigayon nga moatubang siya sa publiko pinaagi sa national television, wala unta siya niining maong sitwasyon.

Ug alang nako wala makatabang pagkumbinsir sa mga hurado sa ICC ang pamasangil ni Kaufman sa media. Hinuon posibling makadaot ni sa ilang depensa tungod kay ang bisan unsang pangatake sa media maisip nga pangatake sa demokrasya.

Ug alang sa usa ka tawong giakusahan sa lapad nga pagpanglugpit sa tawhanong katungod atol sa iyang administrasyon, ang pagpangatake sa media maoy katapusang butang nga imong buhaton.