2 ka aktibista
1990. Gidakop ang unang aktibista kuyog sa ubang estudyante sa University of the Philippines samtang nag-martsa paingon sa protesta sa US Embassy. Gipahibawo niya ang kapolisan nga anak siya og senador. Gibuhian siya sa mga imbestigador pero gitanggong ug gipasakaan og mga kaso ang iyang kaubanan. Na-eskandalo pag-ayo ang mga tinun-an sa UP nga ang aktibista nga opisyal sa student government makaako sa pagtalikod sa kawsa para sa personal nga kasayon.
Ang amahan nga senador mao si Rene “Compañero” Cayetano. Ang iyang anak nga aktibista mao si Alan Peter Cayetano.
* * *
1987. Tulo ka tuig sa wala pa makalusot ang unang aktibista, nadakpan ang ikaduhang aktibista nga tinun-an sa School of Law sa Manuel L. Quezon University ug duha ka kauban samtang nagprotesta sa sidewalk kuyog sa urban poor groups.
Pag-abot sa presinto, gibalibaran sa kapolisan ang iyang hangyo pagtawag og abogado. Gipahuwat og pila ka oras una gisugdan ang imbestigasyon. Pagkuha na sa ilang mga ngalan nga nahibaw-an sa mga imbestigador nga senador diay ang iyang amahan. Mao nga sila na ang nag-apura nga manawag dayon sa telepono.
* * *
“Tay, tingalig dili ko makapauli og sayo kay natanggong ko diri sa Presinto 5.”
“Anak, ubos sa 1987 Constitution dili na ko makahimo sa pagpangabogar nimo.”
“Nahibawo ko, Tay, pero mahimo ba nga pangitaan ko nimo og abogado?”
Buhian unta siya sa kapolisan pero nipili sa pagkuyog sa duha niya ka kauban. Naabtan og 16 ka oras una nakagawas sa presinto.
Ang amahan mao si Senador Wigberto Tañada. Ang anak mao si Erin Tañada.
* * *
2026. Ang unang aktibista gipalagpot sa pagka Senate president sa 12 ka senador nga nangangkon og quorum base sa desisyon sa Korte Suprema sa kasong “Avelino v. Cuenco” sa 1949.
Nakatampo sa pagkaumol sa “Avelino doctrine,” nga maoy giya sa mga korte paghusay sa mga kontrobersiya sa quorum hangtod karon ang apohan sa ikaduhang aktibista. Si Senador Lorenzo Tañada maoy nihimo sa expose batok ni Senate President Jose Avelino, nga napugos pagbiya sa sesyon. Pero ang nahibiling 12 ka senador apil si Tañada nideklarar og quorum, ni-bakante sa tanang puwesto ug nipili og bag-ong Senate President. Ang kaligdong usahay matsambahan og patigbabaw.
* * * *
- Latest
