EDITORYAL - In aid of legislation pa ba ni?

Daghan kaayong gipangbutyag nga mga pangalan ang 18 ex-marines nga giingong resource persons sa Cayetano Senate Blue Ribbon Committee hearing mahitungod sa flood control projects sa gobiyerno.

Ang mga gipangalanan  gipasanginlan sa maong mga resources persons nga nakadawat og mga maletang puno sa kwarta. Ang hearing gipangulohan ni Sen. Rodante Marcoleta niadtong Hunyo 4.

Ang maong mga ex-marines nga gipresentar nilang Cayetano ug Marcoleta nangangkon nga mga bagmen ni kanhi Ako Bicol representative Zaldy Co.

Una nang gipadaplin sa niaging inquiry sa Senate Blue Ribbon Committee sayo ning tuiga ug wala mopirma ang mga senador sa committee report adto tungod kay dili katuohan ang ilang mga pasangil.

Apan karon, sa gihimong hearing sa paksyon ni Cayetano subli nilang giwadwad ang mga pasangil batok sa pipila ka mga magbabalaod, mga human rights activists ug uban pa.

Apil sa gipanghinganlan mao silang Senador Tito Sotto, Sen. Erwin Tulfo, Bicol Saro Rep. Terry Ridon, ML Party-list Rep. Leila de Lima, human rights activist ug kritiko batok war on drugs nga Fr. Flaviano Villanueva , mga kanhi Makabayan bloc representatives France Castro, Arlene Brosas ug Raoul Manuel, kanhi senador Antonio Trillanes III,  ug uban pa.

Una nang gipasanginlan sa grupo si Presidente Ferdinand Marcos Jr. ug iga-agaw niyang si kanhi House Speaker Martin Romualdez nga nakadawat pud mga maletang kwarta.

Silang tanan pulos nihimakak sa alegasyon sa maong mga ex-marines. Ang ingon sa mga gipasanginlan, pulos hinimo-himo ang mga akusasyon ug gituyo kini aron libugon hunahuna sa katawhan.

Kung analisahon og maayo ang ilang mga alegasyon ug kun si kinsa ang ilang gialegar nga nakadawat og male-maletang kwarta, pulos mga dili kaalyado nilang Cayetano ug kritiko sa mga Duterte.

Sayun ra kaayo ang mamasangil, pero ang lisud mao ang pagpamatuod diha sa hukmanan aning mga alegasyon. Apan sa gihapon, duna na ni epekto sa hunahuna sa mga tawo.

Kaning hearing sa senado tinuoray ba ni nga “in aid of legislation” ang tumong para maputol ang kurapsyon o salida lang para dauton ang ilang mga kaatbang?

O ang pagduda sa kadaghanan nga posibleng duna ni koneksyon sa umaabot nga impeachment trial batok kang VP Sara Duterte?