Alkanse sa MCWD
Usa ka bilyon ka pesos na ang utang ug alkanse sa Metro Cebu Water District (MCWD). Mao na ang labing bag-ong numero nga gihatag sa kasaligan nakong mga tinubdan. Kinsa nipasidaan nga mahimong moburot pa sa mosunod nga mga semana.
Kon maningil ang dugang pa nga bulk water suppliers. Ug kon mahingpit na sa bag-ong liderato sa MCWD sa pagsubli ang tanang gikuwestiyon nga mga transaksiyon sa mga kanhi tagdumala nga gipangulohan sa mga kanhi chairpersons sa MCWD board nga silang Mike Pato ug kanhi Cebu City Councilor Joey Daluz.
* * *
Kay wala man silang kalili sa mga dokumento nga giingong gitagoan nilang Pato, Daluz ug kaubanan sa nangaging katuigan, nagpakabana nga mga opisyal sa MCWD niangkon nga ang ila pa lang nakit-an mao ang P400 milyones nga utang nga gipaningil na sa Mactan Rock Industries ug sa Abejo Waters Corporation.
Nahadlok sila kon pila na say utang sa MCWD nga posibleng mas dako pa pero wala pa lang paningla sa Manila Water ni Enrique Razon sa Carmen, Cebu ug JE Hydro and Bio-Energy Corporation sa Lusaran, Cebu City ug uban pang suppliers.
* * *
Lisod tuohan nga ma-alkanse ang MCWD kon tan-awon ang taas nga linya kada adlaw sa mga konsumidor nga naneguro og bayad aron dili sila maputlan, bahala na kon pila ka oras rang agas kay dako ang bayad ug mas dako ang kahasol sa pagpataod og balik. Maong daghang nagduda nga nisimang ang dakong kita sa MCWD ngadto sa pribadong mga bolsa.
Pero sakto sang bag-ong MCWD Chairperson nga si Ruben Almendras: Ang ang presyo nga gibayran sa mga konsumidor katunga ra sa gitakda sa kontrata sa bulk water suppliers.
* * *
Sayop hinuon ang pasiunang mga lakang nga gipahibawo ni Almendras sa pagpugong sa nag-ung-ong nga pagka-bangkarota sa MCWD: Pag-uminto sa bayranan ug pagpangutang na sab. Siyay sunod balikason sa mga konsumidor kon iyang dayonon.
Mas makiangayon nga sublion una nila ang mga kontrata nga gipirmahan nilang Daluz ug Pato ug kaubanan. Dili magsapayan ang mga Sugbuanon pagbayad sa mas taas nga presyo kon makaseguro nga dili sila maoy magbaguod og bayad sa kickback sa gipasanginlang mga ungo sa MCWD.
* * *
- Latest
