Pabaga sa nawong

Alang sa mga ordinaryong anak sa singot, way sweldo kun absent sa trabaho tungod kay mao ni lagda sa balaod sa pamoo--"No work, No pay".

Hinungdan nga ang uban, labi pa intawn kadtong dili pa regular sa trabaho, bisan may sakit mopugos gyud og tambong sa trabaho tungod  kay nangiyawat sa dyutayng sweldo alang sa pamilya.

Apan samtang mao ni ang sitwasyon sa mga ordinaryong trabahante sa nasud, dunay usa ka senador nga sweldado sa buhis sa katawhan ang padayong nagdawat og sweldo bisan dugay nang way trabaho.

Sukad pa niadtong Nobyembre sa miaging tuig nga wala na mosulod sa trabaho si Senador Ronald dela Rosa tungod kay nahadlok nga dakpon.

Nitumaw man gud ang mga report nga duna nay warrant of arrest nga giluwatan ang International Criminal Court (ICC) batok niya tungod sa samang kaso nga giatubang ni kanhi presidente Rodrigo Duterte.

Atol sa pagbalik sa session sa Senado niadtong Lunes wala gihapoy anino ni dela Rosa nga mipatim-aw.

Ang pait kay padayon nato siyang gisweldohan bisan nagtago-tago ug wala moreport sa trabaho.

Si Senador Panfilo Lacson, president pro-tempore sa Senado, miingon nga di nila mahimong putlon ang sweldo ni dela Rosa tungod kay hilom ang ilang lagda kabahin sa "No work, No pay" policy.

Iya hinuong gikonswelo ang publiko nga gisugdan na nila sa pagtuon ang posibilidad nga amendahan ang ilang house rules aron i-withold ang sweldo ni dela Rosa hangtod moreport siya pagbalik sa trabaho.

Ang pait kay unya pa nila kini mahimo human unya maresolber ang ethics complaint nga gitinguhang iduso ni kanhi senador Antonio Trillanes karong Marso.

Sa ato pa hangtod mahitabo ni magbagood ang publiko pagsweldo sa senador nga way trabaho. Lupig pay pensionado ni dela Rosa!

Ang kampo ni dela Rosa sa sayo pa miingon nga nakasabot ra kuno ang publiko sa iyang sitwasyon. Tinuod nasabtan sa publiko ang iyang pagtago apan ang di masabtan mao ang iyang kabaga og nawong nga midawat og sweldo bisan wala niya trabahoi.

Ang angayan niyang buhaton mao ang pagluwat sa katungdanan sanglit di na man siya makahimo sa iyang trabaho.