Lemon water at calamansi water

1. Ang lemon at calamansi ay mayaman sa vitamin C at fiber na maganda sa balat, mata at puso. Isang anti-oxi­dant ang Vitamin C na nagbibigay proteksyon sa selula. Po­sible na makatutulong din sa sipon, lagnat, at problema sa gilagid.

2. Ang mga citrus fruits, tulad ng lemon, dalandan, orange at calamansi ay mayaman sa Vitamin C na kailangan para ma-absorb ng katawan ang iron at hindi maging anemic.

3. Hindi pa tiyak pero baka makakatulong sa pagpapapayat ang lemon dahil binabawasan nito ang gana kumain. Kapag uminom ka ng lemon water ay mas busog ka. Kaya konti na lang ang makakain.

4. Dahil umiinom ka ng mas maraming tubig, makatutulong ito para hindi ma-dehydrate at kumulubot ang balat. Makaiiwas din sa pagbuo ng bato sa bato (kidney stones).

5. Mag-ingat lang dahil kapag matapang ang pagkakagawa ng lemon water, puwede makasama sa may ulcer at makasira ng ngipin.

6. Subukan ang ganitong timpla: Ihalo ang 1 lemon sa 1 litro na tubig. Tamang tama ito.

* * *

Salabat para sa arthritis

Batay sa pag-aaral, ang salabat ay mabisa sa pama­maga, tulad ng pain relievers. Sa pag-aaral sa mga pasyenteng may arthritis sa tuhod, ang salabat ay nakababawas ng sakit ng 40 percent. Maganda rin ito para sa pagduduwal at pag-aalaga sa boses.

Subukang uminom ng isang tasa ng mainit na salabat pagkagising sa umaga at sa bandang hapon.

Narito pa ang iba pang benepisyo ng salabat:

1. Pinapaganda ang takbo ng dugo – Nakakatulong itong gumanda ang circulation ng dugo lalo na sa may high blood pressure at mataas ang cholesterol. Nakatutulong itong linisin ang daanan ng dugo.

2. Nagpapalakas ng immune system – May taglay itong gingerols at gingerdiol na nakakatulong labanan ang mga virus at bacteria, at palakasin ang resistensiya natin. Tumutulong din itong labanan ang cancer cells.

3. Nag-aalis ng mga sakit at hirap dulot ng regla o dysmenorrhea.

4. Nagbabawas ng pamamaga o inflammation – Nakakatulong itong bawasan ang arthritis, at pananakit ng ibang parte ng katawan.

5. Para sa stress – Nagdadala ng ngiti sa labi dahil nagtataboy ito ng stress. Nakatutulong na makalma ang nerves.

6. Nag-aayos ng panunaw at pagsipsip o pag-absorb ng sustansiya mula sa mga pagkain.

7. Nakatutulong na ma-improve ang memory at ibang function ng utak.