Sobra pa's quota

Wala man gyud lung-i sa kinaiyahan ang atong dapit nga kapila na ka higayon nasukamod ug wala pa gani makabangon bisan gamay human gikulata sa nag sunod sunod nga katalagman, karon laing kinumo ug patid na usab sa bagyong Wilma ang nagpanikad na usab sa pagdapat sa mga tawo.

Moingon ang uban nga naka-quota na kuno kita, hagbay ra oy sobra na kaayo. Naa say moingon nga basin ma imune o maanad ra ang mga tawo sa ingon niini nga kasinatian sa panahon ug maka adjust nalang ta ani ug makalikay sa kabangis sa bagyo.

Pastilan dili madala og anad anad ug labaw na nga dili mahimong himoon nga komedya ang kinaiyahan kay kon dili nimo seryosohon seguro nga ikaw ang maseryoso nga maangol o mas grabe mamatay kon dili magbantay.

BItaw sa tinuod lang nakamugna kini pg grabeng kahadlok sa mga tawo nga bisan gani kong yanong uwan lang malisang naman ta, yanong lim-aw sa tubig mahadlok naman ta tungod sa leptospirosis, kong kaniadto sayon sayonon lang nato ang pag ubog sa baha apan karon molagpot naman atong espirito kong makakita og baha kong wala tay butas nga isul-ob.

Unsa man ni ang nahitabo karon, kabahin ni sa cleansing nga gimugna sa kinaiyahan tungod sa grabeng pag abusar kaniya? maayo unta kong kadtong mga nanamastamas sa kinaiyahan ang direktang maapektohan apan dili man kay sila anaa man sa lig-on nilang mga pinoy-anan samtang kadtong mga yanong tawo ang magkapusnga pusnga sa baha, mas grabe ang mamatay tungod sa kastigo sa kinaiyahan.

Hinuon tungod pud sa kinaiya sa mga tawo nga walay pagpakabana sa kinaiyahan magpataka lang og labaw sa mga basura ug bisan usa pa kay nagtoo nga ginagmay ra ang ilang sala kay usa ra bitaw ka plastic ang gilabay sa sapa, bitaw gamay ra sa sinugdanan apan kong imo na kanang nabatasan basin naabot na na og toneladang basura ang napundo ug nasampong sa agianan sa tubig nga maoy hinungdan sa baha.

Sa nahitabo karon sa atong panahon walay gipili ma adunahan man o ma kabus pulos nakasinati sa kabangis sa kinaiyahan, kining iyang kastigo karon dili pa kini mao aduna pay daghang moabot ug kadtong mga tawo nga gahig ulo nga dili gyud mopatuo moabot ra ang higayon nga maabtan mo og masilotan.

Subay sa pag-igo sa bagyong Wilma, gipaneguro sa mga apektadong LGU sama sa Cebu City nga dili na masobli pa ang nahitabo sa bagyong Tino nga hilabihan ka bangis nga daghang mga tawo ang namatay busa giawhag na nila ang mga tawo nga mohikling na kay lahi na ang panahon karon dili na mopasaylo sa mga gahig ulo.

Amping lang gyud ta ug hugot nga pag ampo ang atong himoon nga dili lang makamugna og dautang epekto ang katalagman nga nanuktok sa atong pultahan karon.kay sobra na kaayo dili na seguro madala busa isalig nato ang tanan sa Ginoo.